Një status i kryeministrit Edi Rama që lutej për shëndetin e deputetit socialist të Shkodrës kapi në befasi shumicën e atyre që ishin fokusuar tek aktualiteti politik.
Postimi i Ramës:
“Miku ynë Paulin Sterkaj po kalon një provë të vështirë pas një befasie shëndetësore, të cilën lutemi ta përballojë si kampioni që kemi njohur gjithnjë, qysh në rininë e hershme kur ngrinte peshë zemrat e sportdashësve brenda e jashtë vendit 🙏Forca mik💪Jemi të gjithë me ty👍”.
Stërkaj, njeriu që u shpall 12 herë kampion në mundje, ka nisur një betejë të vështirë me një goditje të papritur cerebrale që ka pësuar në trurin e vogël gjë që ndikon në humbjen e ekuilibrit. Sipas mjekëve një nga shkaqet e mosparandalimit, mund të ketë qenë mungesa për një periudhë të gjatë kohore e parametrave jetikë nga ana e deputetit, si tensioni, etj të cilat mund të kishin ndihmuar në kapjen në kohë të goditjes.
Nga ana tjetër ata thonë se duhet të kalojnë të paktën 5 ditë derisa të kuptohet saktë se sa e rëndë apo e lehtë mund të jetë goditja në tru dhe pasojat që ajo mund të sjelli në të ardhmen për shëndetin e Sterkajt. Mbi bazën e kësaj do të përcaktohet edhe mjekimi dhe rruga për rikuperimin e goditjes tinzare për ish kampionin e madh të mundjes shqiptare.
Pranë repartit të reanimacionit të Spitalit nr. 5 kanë shkuar shumë të afërm, sipmatizantë, deputetë e ministra. Por gjendja e tij shëndetësore për momentin kërkon veç qetësi ndërkohë që ministrja e shëndetësisë Ogerta Manastirliu ka qenë pranë kolegut deputet dhe sëbashku me Profesoreshë Mira Rakacolli po ndjekin në vijimësi ecurinë e parametrave jetikë të Sterkajt dhe ciklin e shërbimit të specializuar mjekësor ndaj tij.
Burime pranë Partisë Socialiste e konfirmojnë një gjë të tillë dhe sqarojnë se deputeti i Shkodrës po kalon orët më kritike.
Burime të AlpeNews.al, bëjnë me dije se deputeti ndodhet në spitalin nr.5, pranë QSUT Tiranë.
Të njëjtat burime bejne me dije se Stërkaj ndodhet në reaminacion dhe po ndiqet nga Mira Rakacolli.
AlpeNews.al
