Adriatik Llalla dhe Rovena Gashi nuk janë ndarë pothuajse kurrë nga njëri tjetri gjatë 5 viteve kur ishin Nr, 1 dhe Nr. 2 i Prokurorisë së Përgjithshme të Shqipërisë. I shihje kudo. Në zyrë, në shkresa, në mbledhje, në pritje zyrtare dhe jo zyrtare, në udhëtimet e panumërta jashtë Shqipërisë.
I kemi parë bashkë javët e fundit në media kur u janë bërë mediatike dhe publike skandalet e deklarimit apo fshehjes së pasurive. Sidomos pas vendimit të Departamentit Amerikan të Shtetit kur e futi familjen Llalla në listën e zezë të atyre që u ndalohet hyrja në SHBA me motivacionin: Për përfshirje në raste të mëdha korrupsioni në detyrë.
Avokat Ngjela, ish ministri i Drejtësisë, e ka përshkruar mjaft bukur këtë situatë për ta kur shkruan:
“Këta të korruptuar që kanë vjedhë çdo gjë në Shqipëri në 20 vjet; çfarë janë – kriminelë?
Jo, janë qejflinj krimesh.
Këtej e tutje do të shfaqen pronat e korrupsionit.
Gjithsesi, të gjitha abuzive janë, por tani që po shfaqen mediatikisht pronat e Llallës dhe Gashit, duhet që gjithsecili të kujtohet për një gjë?
Si i kanë fituar këta këto prona?
Është shumë e rëndë kur e mendon. Që të gjitha janë para të paguara nga bota e krimit për t’iu mbyllur autorëve dosjet e krimit.
Aty, në ato prona, në pishina, hotele, vila dhe restorante gjendet gjaku i të vrarëve nga krimi i pandëshkuar; gjenden vjedhjet e shtëpive të emigrantëve dhe të shqiptarëve të ndershëm me autorë të liruar nga prokurori; janë paratë e paguara për të legalizuar aktet e vjedhjes së tokave në bregdet nga të gjithë llojet e pushtetarëve dhe nga familjarët e tyre; gjenden paratë e paguara të pushtetarëve, për të legalizuar abuzimet e tyre.
E pse të zgjatemi: thjesht aty, në ato prona, gjendet bashkëpunimi i pastër i prokurorëve me krimin e organizuar.”
Por ka ca kohë që Rovena Gashi po kërkon ti shkëputet Adriatik Llallës nga ky duet i pandashëm. Ka filluar kjo përpjekje për largim, për ndarje, për të ndjekur një rrugë tjetër, pasi Llalla u shkarkua nga Parlamenti. Më pas edhe vetë Rovena Gashi, nga Kryeprokurorja Arta Marku. POr ndryshe nga Adriatik Llalla që e ka gjithë inatin vetëm me Ambasadaroin Amerikan Lu, Rovena Gashi e ka me shefen e re. Sepse ajo e shkarkoi jo vetëm atë por e ktheu në detyrën që i takon edhe bashkëshortin e saj, Drtian Gina, i cili ishte i komanduar si Kryeprokuror i Elbasanit, në kohën kur çifti i lumtur i Prokurorisë Llalla- Gashi, ishin të plotfuqishëm.
Kur Departamenti i Shtetit e futi në listën e zezë Llalla u dorëzua. E kuptoi që i kishte ardhur fundi. Ndaj u tërhoq vetë nga sistemi i drejtësisë dhe nga vettingu. Ketu nisi të ndahet edhe rruga e Rovena Gashit me të. Me sa duket ajo e dinte që ai ishte “i dobët”, jo si ajo.
Ndaj kur Llalla iku nga sistemi i drejtësisë ajo kërkoi të ngjitej edhe më lart. Aplikoi për tu bërë anëtare e Gjykatës Kushtetuese të Shqipërisë.
Por bashke me skandalet e Llallës filluan të bëhen publike edhe skandalet e pasurisë së saj. Ndryshe nga Llalla që i ka deklaruar me çmime deri në 20- 30 fish më të larta se çmimi fillestar, ajo nuk i ka deklaruar fare. Të paktën 16 prona i janë bërë publike.
Llalla sot është zyrtarisht nën hetim për pastrim parash në përmasa të mëdha. Po Rovena Gashi a do i bashkohet, që të rivazhdojnë rrugën juridike, si dikur?! Opinioni publik po pret.
Alpenews.al
