Në vijim të ekspozimit të provave dhe fakteve për çështjen e ish Prokurorit të Përgjithshëm, po publikojmë sot të plotë ciklin e mbyllur të një trasaksioni me një pronë të patundshme, e cila tregon se si Adriatik Llalla fitonte me “një dorë” çerek milioni euro.
Një trasaksion që nuk bën asgjë tjetër veçse firmos një letër që në këtë rast quhet Kontratë shitje (pasuri i epaluajtshme) njëherë me një person, të cilit ia ble ullishten 3 000 metra katrotë në periferinë më të lakmuar të Tiranës për 1.5 milionë lekë. Dhe hapi i dytë i transaksionit është shitja e të njëjtës pronë brenda pak kohësh, por tashmë një biznesmeni dhe sa hap e mbyll sytë, ja ku u siguruan 250 mijë euro.
Por nuk mbaron me kaq. Lehtësia e papërballueshme me të cilën është pasuruar ish Prokurori i Përgjithshëm i Shqipërisë, ka vetëm një “kleçkë” të vogël fare. Nga ato që për një njeri të gjithpushtetshëm nuk është asgjë fare. Por që prapa së cilës sot, kur Adriatik Llalla është zyrtarisht nën hetim për “pastrim parash në përmasa të mëdha” nga prokuroria e Durrësit, fshihet një aferë e errët për të mos thënë e zezë e cila ka nisur të zbardhet zyrtarisht dhe juridikisht.
Shitësi i ullishtës në dokumentin që mban firmën edhe të Adriatik Llallës është shtetasi Eduart Dushku nga Sauku i Tiranës, i cili sot ndodhet në burg. Eshte nje personazh i skeduar dhe i njohur nga policia dhe drejtësia shqiptare, pasi mbi të rëndojnë dënime gjyqësore apo akuza për vrasje, plagosje, armëmbajtje pa leje, dhunë, shkatërrim prone, etj.
Pikërisht ky është personi që ia ka “shitur” Adriatik Llallës 3 000 metra katrorë ullishte në Tiranë për 1.5 milion lekë. Pas pak kohësh, ish Prokurori i Përgjithshëm ia ka shitur të njëjtën pronë pa bërë asnjë investim dhe pa ndodhur asgjë e jashtëzakonshme me çmimet në treg, për 250 mijë euro (249.000 ekzaktësisht) biznesmenit Ardian Beshiri.
Se çfarë konkretisht fshihet pas këtij transaksioni dhe çfarë ka dhën Llalla në këmbim të këtyre 250 mijë eurove, tashmë është një çështje që po hetohet zyrtarisht. Departamenti Amerikan i Shtetit një muaj më parë e futi ish Kryeprokurorin në listën e zezë të saj me motivacionin për përfshirje në raste të mëdha korrupsioni gjatë kohës së ushtrimit të detyrës.
Më poshtë Kontrata e Shijtes së ullishtes ku Llalla e bleu nga Eduart Dushku për 1.5 milionë lekë:
Më poshtë Kontrata e Shitjes ku Llalla të njëjtën ullishte ia shet biznesmenit, për 250 mijë euro:
Përgatiti: Alpenews.al