Më 29 korrik mblidhet online Samit rajonal i liderëve të Ballkani Perëndimor, organizuar nga Këshilli Atlantik, lidhur me bashkëpunimin rajonal ekonomik për të dalë nga ndikimi shkatërrues që pati pandemia e COVID-19.
Këshilli Atlantik mbledh këtë Samit të Partneritetit të Ballkanit Perëndimor për të lehtësuar dhe promovuar hapa konkretë midis liderëve drejt integrimit ekonomik rajonal që mund të stimulojnë rimëkëmbjen ekonomike pas COVID-19.
Në njoftimin e Këshillit Atlantik do të marrin pjesë udhëheqësit e 6 vendeve kryeministri Rama, kryeministri i Kosovës Avdullah Hoti, presidenti i Serbisë, Aleksandar Vuçiç, presidenti i Maqedonisë Veriore, Stevo Pendarovski, Kryetari i Këshillit të Ministrave në Bosnje dhe Hercegovina , Zoran Tegeltija, ndërsa Mali i Zi nga ministrja e Ekonomisë, Dragica Sekulic.
“Ndikimet e pritshme ekonomike dhe sociale të pandemisë COVID-19 në Ballkan kërkojnë veprime urgjente rajonale për të shmangur ngecjen e qëndrueshme ekonomike dhe paqëndrueshmërinë e mundshme që vjen me të. Kjo marrëveshje do të tregojë përkushtimin e udhëheqësve për të nxitur rritjen ekonomike duke ndjekur lëvizjen e lirë të mallrave, personave dhe shërbimeve përtej kufijve të rajonit. Masa gjithashtu do të vërë në lëvizje një plan të rëndësishëm për tërheqjen e investimeve të huaja dhe përshpejtimin e vendosjes efektive të fondeve të rimëkëmbjes COVID-19”, thuhet në njoftimin e Këshillit Atlantik.
