Është zbardhur dosja e prokurorisë për Roland Kryemadhin, i cili pak ditë më parë bëri rezistencë ndaj efektivëve të policisë, duke i kërcënuar me jetë.
Kryemadhi akuzohej për dhunë në familje pasi pengonte fëmijët të shkonin në shkollë me pretendimin se ata i shkollonte Allahu.
Në dosjen e Prokurorisë thuhet se në momentin që efektivët e policisë kanë shkuar në shtëpinë e tij, ai nuk ka qenë në banesë, por ishte rrugës për në shtëpi me biçikletë.
Pasi e kanë parë, efektivët kanë kërkuar ta shoqërojnë atë drejt Gjykatës së Tiranës, por Kryemadhi ka bërë rezistencë duke goditur në bark një prej punonjësve të policisë.
Ai ka arritur të largohet nga duart e policëve dhe ka hipur në tarracën e banesës së tij me një pistoletë në dorë, duke kërcënuar efektivët.
Ai ka bërtitur me të madhe “pasha Allahun largohuni që këtu se do ju vras”, ndërsa më pas ka zbritur nga tarraca dhe i ka drejtuar armën njërit nga policët që ishin vendosur te dera e banesës.
Policia ka kërkuar ndihmë nga RENEA, të cilët arritën me shpejtësi, por kur u futën në banesë dhe kontrolluan, çuditërisht nuk e kanë gjetur armën.
Prokuroria e vlerëson të ligjshëm arrestin e Kryemadhit, ndërsa mbi të rëndon akuza e goditjes për shkak të detyrës.
Ditën e nesërme do të merret vendimi për Kryemadhin, ndërkohë që familja jeton në zonën e Kamzës dhe njihen si besimtarë ekstremë të fesë myslimane.
