Është e dielë, 1 dhjetor. Banorët që po qëndrojnë në qendrat akomoduese hoteliere në Golem janë zgjuar të qetë, ndonëse herë pas here ndjejnë lëkundje tërmeti. Kanë kaluar gati 5 ditë nga e marta e frikshme dhe frika e paniku dalëngadalë po largohen duke iu rikthyer të gjithë rutinës së të djelës. Dikush sapo ka gjerbur kafenë e mëngjesit, një tjetër ndjek informacionet nga televizori, kurse fëmijët , më të pafajshmit vazhdojnë sikur asgjë të mos ketë ndodhur në këto 6 ditë.
Ndrojtja e ditëve të para ka kaluar dhe banorët kanë nisur të zënë miqësi me njëri-tjetrin. Grupet që po ndjekin menaxhimin e situatës së akomodimit në dy hotelet “FAFA” dhe “KOLAVERI” i kanë përcaktuar detyrat për të gjithë të akomoduarit si dhe programet për ditën. Secili prej tyre i di oraret e të ngrënit në mensë dhe kafet gjatë ditës. Por ka dhe nga ata banorë, që nuk kanë ndryshuar zakonet para tragjedisë.
E diela për ta nuk quhet nëse nuk shkon të bësh Pazar.
“Koha ishte e shkurtër, nuk patëm kohë të merrnim rroba me vete”, thotë Besniku. Plot të tjerë si ai, ndajnë shqetësimin e nevojës për veshmbathje.
Nga ana e shtabit për menaxhimin e krizave askush nuk ka mbetur pa furnizimi me veshmbajthje për fëmijët dhe të moshuarit.
Edhe për fëmijët ka programe argëtimi.
Organizatat vullnetare janë angazhuar me sjelljen e animatorëve në të dyja qendrat akomoduese ku ofrohen animacione, kinema, filma për të vegjël, (këto ndiqen me dëshirë dhe nga të rriturit) Largimi nga shtëpia u ka sjellë dhe diccka të mirë fëmijëve, prindërit kanë më shumë kohë të qëndrojnë me ta.
Të rriturve u merr më shumë kohë televizori. Shtabi ka menduar të instalojë gjithandej monitorë, në hollet e hoteleve si edhe në dhoma.
Por ka dhe nga ata që “u hanë” duart për punë si Altini nga Sukthi 30-vjeç.
Ai ka vetëm një “hall”. Të rinisë sa më parë punën, sepse strehimi dhe ushqimi për të e familjen tashmë është i sigurt.
