Reshjet e dendura të shiut kane prekur edhe shtetin tonë fqinj, Malin e Zi. Në dy ditët e fundit ashtu si edhe në vendin tonë, në Malin e Zi reshjet e shiut kanë qenë të pandërprera. Kjo si pasojë e masave të larta ajrore, dhe të vransirave që janë shfaqur në hartën e Ballkanit jugperëndimor.
Për shkak të reshjeve të dendura të shiut, në mbarë territorin e Malit të Zi është shpallur alarm i kuq. Në 12 orët e fundit më shumë reshje janë regjistruar në Cetinje, 215 litra për metër katror, kurse për shkak të motit të keq, ky qytet ka mbetur pa energji elektrike.
Reshjet e dendura, të shoqëruara me erëra të fuqishme nga jugu, mëngjesin e sotëm kanë përfshirë tërë Malin e Zi. Gjatë 12 orëve të fundit është regjistruar sasi e madhe e të reshurave në të gjithë vendin, ku më shumë në Cetinje, 215 litra për metër katror, në Podgoricë 75 litra, në Nikshiq dhe Kolashin 65, në Shavnik 60 litra, dhe në Zhabljak 54 litra për metër katror. Gjithashtu janë regjistruar edhe erëra të forta deri në 70 kilometra në orë.
Sipas Institutit për Hidrometeorologji dhe Sizmologji, në disa vende priten reshje të dendura. Në fund të ditës, reshjet do të ulen ndjeshëm, kurse në perëndim dhe jugperëndim do të ndalen plotësisht. /alpenews.al
