Ekipi i Romës bëri ditën e djeshme gjestin e bujshëm që bëri shpejt xhiron e rrjetit në profilin e çdo shqiptari.
Kështu në krah të Zapacostës, që u transferua te Roma, shfaqen fotot dhe të dhënat e disa fëmijëve nga vende të ndryshme të botës, që kanë humbur, ku mes tyre spikasin edhe shqiptarët Bleona Mataj dhe Kadri Rexha.
Ndërkohë që për Bleonën për shkak edhe të historisë disa vjeçare dhe të trishtë u bë një “zhurmë” më e madhe mediatike, për Kadri Rexhën e të tjerë fëmijë shqiptarë të humbur fare pak.
Kjo edhe për shkak se historitë e këtyre fëmijëve e adoleshentëve nuk janë bërë të ditura për publikun shqiptar.
AlpeNews.al, zbulon se nuk ka as edhe një artikull për Kadri Rexhën, djaloshin 17 vjeçar shqiptar që është shpallur i humbur në Angli në janar të këtij viti.
Të vetmet që ekzistojnë janë njoftimet e komunitetit ku ai ka banuar si dhe ai i policisë.
