I dërguar special i Trumpit për dialogun Kosovë – Serbi, Richard Grenell, në një bisedë telefonike për gazetën “Koha Ditore”, ka bërë të ditur se është arritur marrëveshja në parim për hapjen e transportit hekurudhor ndërmjet Kosovës e Serbisë.
Gjatë bisedë me një grup të vogël gazetarësh, Grenell ka thënë se gjatë vizitës në Prishtinës dhe asaj në Beograd sot, ka marrë pajtimin e të dy palëve për një hap të tillë.
Marrëveshja është në parim, ndaj sipas tij nga e hëna pritet të negociohen detajet.
I pyetur nga “Koha Ditore”, ai ka thënë se për një marrëveshje të tillë pëlqimin e ka marrë edhe nga qeveria aktuale, por edhe nga liderët e partive që po negociojnë mundësinë e koalicionit qeverisës.
Kujtojmë që me ndikim të SHBA-së, pak ditë më parë u arrit marrëveshja për një linjë ajrore Beograd-Prishtinë, e cila do të ketë fluturime çdo ditë.
