Milani ka pësuar sot një humbje të rëndë për moralin përballë Fiorentinës që vë përsëri në diskutim vazhdimësinë e Rino Gatuzos në pankinën e kuqezinjve. Por vetë trajneri duket se përtej formës së dobët të ekipit, e ka gjetur gabimin edhe të gjyqtarët për mënyrën se si po trajtojnë skuadrën e tij.
“Problemi nuk duhet të jetë nëse jam apo jo i shqetësuar për të ardhmen time. Në tre ndeshjet e fundit kemi shënuar vetëm një herë, kemi dalë nga Liga e Europës, ndaj është një moment i vështirë. Duhet të kuptojmë çfarë nuk funksionon dhe përse. Kur mungojnë lojtarë të rëndësishëm, bëhet më e vështirë. Duhet qetësi, duhet maksimumi në dy ndeshjet e ardhshme.
Mua më kanë masakruar edhe kur kam thënë diçka për orarin e ndeshjeve. Ndaj kur shoh gjëra për të cilat nuk jam përgjegjës, unë mbyll gojën. Por kam qenë futbollist dhe kur shoh një gjyqtar që sfidon një futbollist për 10 minuta me radhë, siç ndodhi me Kastijeho, nuk është e bukur. Ashtu siç tregojmë ne gabimet tona kur luajmë, ashtu duhet të bëjë edhe kush vendos emrat që duhet të arbitrojnë ndeshjet. Gjyqtarët kërkojnë respekt, por janë të parët që nuk e japin. Kjo është e dukshme”, ishin fjalët e Gatuzos.
