Pas kryeprokurorit Çela, ishte kreu i Prokurorisë së Posaçme, SPAK, Arben Kraja para Këshillit të Lartë të Prokurorisë. Kraja theksoi se SPAK, në këtë kohë të shkurtër që ka operuar ka kryer me sukses një sërë operacionesh si dhe ka lidhur marrëdhënie bashkëpunimi me shumë institucione të huaja, në dobi, të përmirësimit të drejtësisë në vend.
Ai gjithashtu tha se SPAK, ka pak kohë që ka nisur punën dhe ndaj rezultatet janë të ngadalta, duke përfshirë këtu edhe pandeminë. Sakaq, Kraja nënvizoi përpara KLP-së, se SPAK ka kontribuar dhe në hapjen e negociatave, e anëtarësimit në Shqipërisë në Bashkimin Evropian.
“Akesesi në bazën e të dhënave, nuk realizohet brenda ditësh. Kërkon kohë. Por fakti që ne ishim në rikonstruksion na lejoi që të punonim me këtë drejtim. Lidhëm me fibër optike serverat. Dhe kemi në dispozicion të dhënat e gjendjes civile, Kadastrën, Policinë dhe SIENA të Europol. Kërkojnë punë, energji dhe njerëz. Kemi arritur aq sa mund të bëjmë. Procedura e emërimit të drejtuesit të BKH dhe hetuesëve. E vetmja problematikë është se nuk i bënim dot të dyja njëkohësisht.
Për përzgjedhjen e drejtorit të BKH, është ngritur një komision përzgjedhës, i cili ka ndjekur gjithë procedurën që ne kemi raportuar. Drejtuesi i BKH dhe unë kemi përcaktuar një komision përzgjedhës për gjithë procedurën e përzgjedhjeve. Procedura ka qenë e gjatë dhe me shumë probleme, por arritirtëm të bënim të mundur që në gusht, grupi i parë të fillojë punën. Është hapur puna për grupin e dytë. E gjithë procedura e përzgjedhjes së drejtorit dhe hetuesit është zgjedhur nën vëzhgim. Një drejtim tjetëri punës ka qenë vetting i personelit, lidhur me vërtetimin e pasurisë dhe pastërtisë së figurës, duke filluar që nga shoferët“, deklaroi Kraja.
