Parku Arkeologjik i Apolonisë u vizitua nga mbi 32 000 vizitorë për këtë 8-mujor, 14 mijë prej të cilëve turistë të huaj.
Kështu konfirmoi sot për ATSH-në, drejtoresha e Parkut Arkeologjik të Apolonisë, Ornela Durmishaj.
Sipas Durmishaj, “të dhënat tregojnë se është tejkaluar si numri i vizitorëve ashtu edhe të ardhurat, krahasuar me gjithë vitin 2017”.
Sa i përket statistikave të muajit gusht, Durmishaj shprehet se “përqindjen më të lartë të vizitorëve e kanë turistët italianë dhe më pas francezët e gjermanët”.
“Parku Arkeologjik i Apolonisë në muajin gusht u vizitua kryesisht nga turistë familjarë”, shprehet Durmishaj për ATSH-në.
Apolonia në Fier është një nga sitet më të mëdhenj të Shqipërisë, por edhe një nga qytetet më të mëdhenj në botën antike. Si një nga 27 Apolonitë e pellgut të Mesdheut, ajo është një nga vlerat e perlat e trashëgimisë tonë arkeologjike.