Norma e papunësisë pritet të ulet edhe me një pikë përqindje gjatë këtij viti, duke arritur në 11.7% të totalit të forcës së punës në vitin 2019, nga 12.8% që pritet të jetë ky tregues në vitin 2018, sipas parashikimeve të fundit të qeverisë. Norma e papunësisë do të vijojë të ulet më tej për të arritur në 9.4% në vitin 2022.
Sipas analizës së Ministrisë së Financave dhe Ekonomisë, pritet që shërbimet të kontribuojnë më shumë në rritjen e kërkesës për punë në krahasim me sektorët e tjerë të ekonomisë.
Punësimi pritet të rritet me një mesatare prej rreth 2.4% në vit gjatë viteve 2020–2022.
Gjatë vitit 2018, qarqet e Vlorës, Tiranës dhe Lezhës patën normat më të larta të papunësinë në krahasim me mesataren kombëtare. Ndërsa Dibra dhe Korça edhe në vitin 2018 ishin qarqet me normat më të ulëta të papunësisë në krahasim me mesataren.
