Instituti i Arkeologjisë, pjesë e Akademisë së Studimeve Arkeologjike ka prezantuar punën 1-vjeçare. Arkeologu Adrian Anastasi u ndal në kërkimet nënujore në liqenin e Pogradecit, në zonën e Linit ku zbulimet ndryshojnë të dhënat e deritanishme të datimit.
“Materiali i grumbulluar nga ekspedita e vitit 2021 ndonëse i papërfunduar dhe i pastudiuar, na jep mundësinë e identifikimit paraprak kulturor dhe kronologjik të Lin 3 (zonifikim). Ai bën pjesë në vendbanimet e neolitit të mesëm të pellgut të Shqipërisë Juglinore. Në aspektin kulturor është i inkuadruar në kulturat Dunavec e Cakran. Ka një ndryshim në datim sepse ne besonim se ishte vendbanim i neolitit të vonë, kur morëm të dhënat e para u kthye në vëmendje që është i neolitit të mesëm” tha Anastasi.
Gjetjet nënujore janë interesante dhe përfshijnë struktura banimi, siç edhe qeramikë që ndihmojnë më shumë për datimin.
“Këta drejtkëndshat e zinj që shikoni në planimetri identifikojnë elementë druri ose gjysmëtra’ që i përkasin sipërfaqes së banimit. Stratigrafia ose kultura materiale e hasur, ishte e vogël dhe shkon nga 2 deri në 11 centimetra. Kemi një nga fragmentet e dyshemesë në situ“.
Gjurmët e palafiteve, ose ndërtesave prej druri mbi ujë, të gjetura pranë Linit në Pogradec, që po studiohen, do të dëshmojnë më shumë për kulturën e zonës më shumë se 5000 vite më parë.