Prej më shumë se 7 ditësh gadishulli i Karaburunit është përfshirë nga flakët, Ministria e Mbrojtjes ka nisur një helikopter.
Mjeti fluturues ka nisur ndërhyrjen me ujë nga ajri për ditën e dytë radhazi për të shuar flakët që po rrezikojnë të “zhveshin” nga gjelbërimi një prej vendeve më piktoreske në Shqipëri.
Ndërkohë pas mesnate është përfshirë sërish nga flakët mali i Tragjasit në anë të ByPass-it të Vlorës, por situata është vënë në kontroll për disa orë.
Ditën e sotme janë nisur në drejtim të malit të Karaburunit 30 forca të ushtrisë nga repari i Poshnjës në Berat, ndërkohë dhe 10 punonjës se ADZM . Një shqetësim ngelet dhe era e cila i favorizon flakët. Ditën e djeshme u bë e mundur neutralizimi i zjarrit afër banesave te fshatit Dukat i Ri, ndërkohë që sot në lartësinë e malit të Karaburunit ku flakët janë preznte është e pamundur të ndërhyet nga terreni ndaj kërkohet ndërhyrja nga ajri. Ka qenë prefekti i Vlorës, Flamur Mamaj ai që ka deklaruar se ka kërkuar që edhe sot të ndërhyhet me helikopter për të vënë në kontroll flakët.
Aktualisht vatra aktive zjarri në Vlorë ka edhe në kodrat e Radhimës dhe në Malin e Kuçit. Në Kuç sipërfaqe të mëdha me shkure vijojnë të digjen. Ndërkohë zjarri mbi fshatin Tragjas është aktiv por që nuk rrezikon banesa vetëm shkurre dhe pemë.
