Me konsultimin e ekspertëve izraelit, qeveria shqiptare ka gati paketën ligjore Anti-KÇK për të goditur pasuritë e krimit të organizuar dhe prokurorët e gjyqtarët e korruptuar që teksa presin të “digjen” në vetting, po i bëjnë favoret e fundit kriminelëve. Kryeministri Edi Rama tha se paketa ligjore KÇK do të ketë bashkëpunimin në terren me partnerët për korrupsionin shtetëror, por edhe në sektorin privat.” Do të jenë pjesë e Anti-KÇK inspektorët e Guardia di Finanza dhe FBI”, tha Rama.
Kryeministri dha detaje duke thënë se kriminelë të rrezikshëm të cilët i kanë shpëtuar drejtësisë, dhe ka dyshime se pasuria e tij është vënë me lekë krimi, do të duhet të dalë para gjykatës dhe të justifikojë një më një pasuritë e tij. Nëse kjo nuk ndodh, ai do të kthehet në burg për pasuri të paligjshme. Ndërkohë që prokurorët dhe gjyqtarët e korruptuar, kryeministri tha se do të preken nga ligji anti-mafie.
Grupi KÇK, sipas shefit të ekzekutivit, i ka dhënë dorë krimit të organizuar, ku shpesh personat të cilët e kanë pasur për detyrë që kriminelë dhe grupe kriminale t’i linin parapa hekurave, janë bërë palë me ta.
Por për kreun e qeverisë, tashmë ka ardhur koha që kjo gjë të marrë fund, e për këtë qeveria shqiptare ka punuar me ekspertë të huaj, ku konsulenca kryesore ka qenë me një grup ekspertësh nga Izraeli për të marrë përvojën e tyre nga e ashtuquajtura “Fauda” e forcave komando izraelite në kapjen apo eliminimin e elementëve të rrezikshëm terroristë në Izrael dhe Palestinë.
Kryeministri Edi Rama në përfundim të prezantimit të paketës ligjore anti-KÇK tha se kush nuk e voton KÇK-në do të përjashtohet nga grupi parlamentar socialist.
