Pak ditë para vendimit për hapjen ose jo ë negociatave mes Shqipërisë dhe BE-së për anëtarësim, Presidenti i Republikës, Ilir Meta ka udhëtuar drejt Gjermanisë. Ai është pritur sot nga Presidenti i Bundestagut të Gjermanisë, Dr. Wolfgang Schäuble.
Presidenti Meta shprehu mirënjohjen e thellë për ndihmën dhe mbështetjen e gjithanshme që Gjermania i ka dhënë Shqipërisë dhe shqiptarëve, 30 vite bashkëpunim diplomatik dypalësh.
Në mënyrë të veçantë, Meta vlerësoi rolin dhe angazhimin e Gjermanisë në drejtim të integrimit të Shqipërisë dhe vendeve të tjera të Ballkanit Perëndimor në Bahkimin Evropian.
Duke iu referuar progresit të bërë në përmbushjen e prioriteteve kyçe, Presidenti theksoi rëndësinë e jashtëzakonshme që do të kishte një vendim pozitiv i Bundestagu gjerman në favor të çeljes së negociatave të anëtarësimit me Shqipërinë dhe Maqedoninë.
“Çelja e negociatave vetëm do të na ndihmonte më shumë për të adresuar më mire të gjitha prioritetet dhe përmbushur standardet dhe kriteret e nevojshme, si dhe do të jepte një sinjal shumë pozitiv për të gjitha forcat në rajon”, nënvizoi Presidenti Meta.
Gjatë takimit u vlerësua premtuese dhe inkurajuese marrëveshja mes qeverisë greke dhe asaj maqedone për zgjidhjen e cështjes së emërit të Maqednisë dhe u theksua rëndësia e përfundimit të fazës finale të dialogut Kosovë-Sërbi.
Të dy bashkëbiseduesit ndanë shqetësimin për çështjet e sigurisë që kërcënojnë rajonin e Ballkanit Perëndimor dhe theksuan nevojën e një bashkëpunimi më të ngushtë në këtë drejtim, si në nivel dypalësh ashtu edhe në atë rajonal e evropian.
