Pagesat direkte për individë e biznese nga dhe drejt Shqipëri–Evropë janë çështje muajsh. Ndërsa e gjithë infrastruktura ligjore dhe operacionale ka marrë zgjidhje, zëvendësguvernatorja e parë e Bankës së Shqipërisë, Luljeta Minxhozi tha në Televizionin Publik, në emisionin “Kuota”, se zgjidhja për Shqipërinë, si pjesë e rajonit, është bërë përmes një kloni teknologjik të ofruar nga Banka e Italisë.
“Ne nuk kemi të drejtë ende, pasi nuk jemi anëtarë të BE-së, të marrim pjesë direkt në mënyrë të drejtpërdrejtë në këtë sistem. Nga ana tjetër, ligjërisht jemi gati për t’u lidhur me këtë sistem. Në këtë proces na ka ndihmuar Banka e Italisë nëpërmjet bankës qendrore, sepse Banka e Italisë është zotëruese e këtij tipsi dhe ka nxjerrë një klon të këtij tipsi një klon teknologjik, i cili është vënë në dispozicion të gjashtë vendeve të Ballkanit Perëndimor”, tha zonja Minxhozi.
Sipas zëvendësguvernatores së parë, Minxhozi, dy faktorë e kushtëzuan realizimin.
“Është një marrëveshje dhe së dyti, një infrastrukturë që lejon që këto pagesa të ndodhin. Shqipëria iu drejtua Autoritetit Evropian të Pagesave me një kërkesë. Procesi ishte relativisht shumë i detajuar në të gjitha aspektet”, tha zv,guvernatorja e parë e Bankës së Shqipërisë.
Nga ana tjetër, futja në këtë sistem është arritur dhe ndikon edhe në rritjen e besimit ndaj sistemit bankar shqiptar.
“Anëtarësimi institucional në SEPA na ka hequr këtë stigmë institucionale. Ne sot i kemi të gjitha instrumentet për të treguar se pagesat tona janë ligjore, formale dhe në përputhje me të gjitha aktet e Bashkimit Europian”, theksoi ajo.
Pagesat direkte me Evropën janë ndër ato realitete ku ekonomia nuk është vetëm politikë, por përditshmëri.
