Eugena Tomini, Shefja e Survejancës dhe Shërbimit të Inteligjencës Epidemike në ISHP, ka treguar mbrëmjen e sotme se që në fund të muajit janar ata kanë kryer shumë teste për koronavirus, por ato kanë dalë negative.
Referuar dhe imazheve radiologjike të mjekëve të ndryshëm që kanë qarkulluar në rrjet, dhe që pohonin se virusi mund të ketë qenë në Shqipëri që në janar, Tomini iu përgjigj duke thënë se pacienti zero në vendin tonë është konfirmuar më datë 9 mars.
“Mbështetur në të dhënat tona, ju siguroj që në fund të muajit janar laboratori i virologjisë nuk ka ndalur së testuari raste për Covid-19. Asnjë prej tyre nuk ka rezultuar me koronavirus. Për ne, pacienti 0 është ai i konfirmuar në datën 9 mars”, ka thënë Tomini për A2 CNN.
Ndërkohë, shefja e Inteligjencës Epidemike në ISHP ka folur dhe për sezonin e verës.
“Vera do të jetë ndryshe nga të tjerat, nuk do të jetë ajo lirshmëria e të shijuarit të detit dhe diellit. Do të ketë rregulla strikte për bizneset dhe turistët. Unë mendoj se me respektimin e protokolleve të caktuara, edhe kjo verë do të shijohet, por në mënyrën e saj të veçantë”, përmbylli mjekja Eugena Tomini.
