Zëdhënësi i Bashkimit Europian për Politikë të Jashtme dhe Çështje të Sigurisë, Peter Stano, ka folur edhe njëherë për vizitën e pesë të dërguarve të posaçëm nga Bashkimi Europian dhe Shtetet e Bashkuara të Amerikës në Kosovë dhe Serbi.
Sipas tij, të dërguarit e BE-së dhe SHBA-së, si dhe këshilltarët kryesorë të liderëve të Francës, Gjermanisë dhe Italisë, do të udhëtojnë në Kosovë dhe Serbi të shtunën për të siguruar “përparim të prekshëm” në zbatimin e Marrëveshjes së Ohrit dhe uljen e tensioneve sidomos pas ngjarjeve në Banjskë të Zveçanit në veri të vendit.
Në të njëjtën kohë, burime diplomatike evropiane i thanë agjencisë BETA se zyrtarë të lartë të vendeve kryesore perëndimore po shkojnë në Prishtinë dhe Beograd me kërkesën jo vetëm për të ndalur përshkallëzimin e situatës në Kosovë si dhe zbatimin e Marrëveshjes së Brukselit për themelimin e Komunave me shumicë serbe.
Zëdhënës i BE, Peter Stano i tha agjencisë se Miroslav Lajçak, Gabriel Escobar dhe këshilltarët për siguri të presidentit të Francës, kancelarit gjerman dhe kryeministrit të Italisë, Emanuel Bonn, Jens Pletner dhe Francesco Talo, do të zhvillojnë bisedime me kryeministrin e Kosovës. “Me pritshmëri të qarta se të dyja palët do të vazhdojnë procesin e normalizimit të marrëdhënieve dhe do të zbatojnë detyrimet e tyre pa vonesë dhe pa kushte”, ka thënë ai.
Në të njëjtën kohë, autoritetet serbe duhet të bëjnë gjithçka për të ndriçuar sfondin, autorët dhe organizatorët e dhunës në Banjskë të 24 shtatorit, tha zëdhënësi i Përfaqësuesit të Lartë të BE-së, Josep Borrell.
Sepse, sipas tij, Prishtina dhe Beogradi duhet të kenë parasysh se Bashkimi Evropian, anëtarët e tij dhe SHBA-të vazhdojnë të ofrojnë mbështetje të fuqishme për zgjidhjen e mosmarrëveshjeve ndërmjet Kosovës dhe Serbisë dhe të ardhmes evropiane të gjithë rajonit.
Diplomatët në selinë e BE-së theksuan se pesë zyrtarët e lartë perëndimorë po kërkojnë nga kryeministri i Kosovës Kurti që të organizojë sa më parë zgjedhjet e reja komunale në veri të Kosovës.
“‘Kurtit po ikën koha’ dhe, në të kundërtën, ai do të jetë edhe më i izoluar, e me këtë edhe e gjithë Kosova. Beogradi, në të njëjtën kohë, duhet të dëshmojë se nuk ka qenë i përfshirë në mënyrë të drejtpërdrejtë apo të tërthortë në ngjarjet në Banjskë”, shkruan agjencia.
“Vuçiç duhet ta veprojë shpejt, sepse në Bashkimin Evropian nuk ka durim të pafund dhe tashmë po diskutohen masa të caktuara në qarqet evropiane në rast se Beogradi nuk e bën atë që pritet”, tha diplomati.
Kur u pyetën nëse Beogradi tani po bashkëpunon në hetimin e asaj që ndodhi në Banjska, këta zyrtarë u përgjigjën se “nuk bëhet fjalë për një hetim gjyqësor-policor, por për përpjekje të forta për të shmangur përfitimin” nga ngjarja.
