Operatori i Shpërndarjes së Energjisë Elektrike, OSHEE, ka publikuar sot te dhenat lidhur me numrin e ankesave dhe zgjidhshmerise qe u eshte dhene atyre.
“Duke iu referuar të dhenave të fundit, në raport me një vit më parë, si 9-mujor, në vitin 2018 vërehet një trend pozitiv i uljes së numrit, konkretisht kemi 32.8% më pak ankesa”-njofton OSHEE.
Sipas saj për periudhën 9-mujore të 2018 numri i ankesave të depozituara pranë qendrave të Kujdesit ndaj Klientit apo në Drejtorinë e Marrëdhënieve me Klientin (përmes protokollit), janë 31.699, ndërsa për të njëjtën periudhë, pra në 2017, u trajtuan 45.289 ankesa.
Nga të dhënat e analizuara prej Drejtorisë së Marrëdhënieve me Klientin (DMK) pranë OSHEE Sh.A, mesatarja e ankesave mujore në raport me numrin total të faturave që emetohen nga OSHEE, është në nivelin 0.25%.
“Një tregues i rritjes së performancës së shërbimit ndaj klientit është dhe zgjidhshmëria maksimale e ankesave të raportuara”- thote OSHEE, duke shtuar se “Për 9-mujorin e vitit 2017, morën zgjidhje rreth 30437 nga 45.289 që ishin raportuar pranë OSHEE, ndërsa për 2018-n, kanë marrë zgjidhje rreth 32.786 ankesa, përfshi brenda saj dhe ankesat e akumuluara”.
Totali i ankesave në raport me numrin e faturave të gjerenuara përgjatë një viti nuk zë një peshë më shumë se 1%.
“Së fundmi, OSHEE ka nisur të operojë përmes sistemit të ri të “menaxhimit të klientëve” në disa rajone të vendit, dhe pritet të kompletohet në të gjitha degët brenda muajit nëntor. Ky sistem ka disa avantazhe, si rrit kontrollin dhe standardin e procesit të leximit dhe përshpejton në kohe dhe cilësi zgjidhjen e kërkesë/ankesës”- perfundon njoftimi.
