Partia më e madhe opozitare në Grqi, Demokracia e Re kërkon që teksti i marrëveshjes së pritshme midis Athinës dhe Tiranës të t’i jepet parlamentit para se të nënshkruhet.
Shefi i departamentit të jashtëm të kësaj partie, Jorgos Koumoutsakos, ka kërkuar interpelancë me ministrin e jashtëm Nikos Kotzias.
Sipas Koumoutsakos, “duhet të shmanget vënia para fakit të kryer”, siç ndodhi me marrëveshjen Athinë-Shkup, “një precedent negativ ku qeveria dhe ministria e jashtme i shkaktuan një dëm për interesat greke”.
Në letrën shoqëruese Koumoutsakos i drejton disa pyetje ministrit të jashtëm grek:
-Në çfarë stadi ndodhen negociatat me palën shqiptare?
-Cila është tematika e plotë e diskutimeve me homologun tuaj shqiptar?
-A vazhdon pala shqiptare të ngrejë pretendime për çamët?
-Në çfarë pike konkrete ndodhen negociatat për delimitimin e zonave detare, krahasuar me marëveshjen e parë që ishte nënshkruar nga Greqia dhe Shqipëria?
-A është fiksuar një datë e saktë për marrëveshjen e pritshme greko-shqiptare që po negocioni dhe cila është kjo datë?
Koumoutskos komenton se nga pala shqiptare nuk përjashtohet që negociatat të finalizohen deri në samitin e radhës të BE-së, më 28-29 qershor, ndërsa ministri i jashtëm grek ka deklaruar se problemet me Shqipërinë do t’i zgjidhë para se të shkojë me pushime.
