Shefi i Kirurgjisë në QSUT Arben Gjata, ka thënë mbrëmjen e sotme nga nga e hëna që vjen do të nisin operacionet kirurgjikale, të ndërprera për shkak të covid-19.
“Bëhet fjalë për rifillimin e aktivitetin në tre shërbime, me patologjitë malinje, me kancerin javën e parë dhe do punojmë me një kapacitet të përgjysmuar, me dhoma teke, deri sa të kalojë java e parë,ndoshta edhe e dyta, që të fillojmë me kapacitet të plotë. Për ato që nuk janë malinje, maksimumi brenda dy javëve do fillojnë edhe këto. Ne kemi bërë një protokoll ku pacientët para se të shtrohen në spital do bëhet konsulta nga kirurgu dhe reanimatori, do u bëjmë jo vetëm skaner të barkut, por edhe të mushkërive se është metodë e mirë për të parë nëse pacienti është apo jo me COVID-19. Janë marrë masat nga spitali. Siguri të plotë nuk ka askush”, tha mjeku Gjata në emisionin RepolitiX.
Më tej, ai shtoi se nëse pacienti rezulton pozitiv me koronavirus do të shtrohet në spital dhe pasi të shërohet nga infeksioni, do ti nënshtrohet ndërhyrjes kirurgjikale.
“Nëse rezulton me COVID, nëse është urgjent, në sanatorium është bërë një operacion, nëse nuk është do presim, ose do shtrohet në spital dhe pasi ta kalojë do të bëhet operacioni. Edhe në rrethe kanë operuar urgjencat, problemi kryesor ka qenë transferimi i të sëmurëve, se një pjesë e mirë i sillnin në QSUT. Nuk do të lejohen familjarët, në mënyrë absolute. Mund të pranohen në pavijone raste shumë të rralla me kërkesën e shefit të shërbimit dhe aprovimit nga drejtoria e QSUT, se nga dashuria e madhe mund të marrë në qafë”, tha Gjata.
