Kryeministri Edi Rama tha se Operacioni Forca e Ligjit duhej të ishte miratuar më herët, por momenti i duhur ishte me ngritjen e institucioneve të reja të drejtësisë që kanë tashmë edhe besimin e partnerëve ndërkombëtarë.
“Çfarë po bën OFL dhe pse, dhe pse nuk ka lidhje me shtet policor, mbivendosje të kompetencave, por ka lidhje me atë që po të kishim pasur mundësi do e bënim me kohë e me vaktë. Dje e patë që SPAK mori të pandehur ish-kryeprokurorin e Përgjithshëm. Imagjino të bënim aktin pa u krijuar SPAK, pa vetting, dhe t’ia çonim KÇK-së në dorë, X-i është i dënuar, dënim sipas ligjit, por duhet të provojë që ndërkohë këto pasuri që gëzon nuk buron nga krimi por nga puna e tij e rëndë në mbledhjen e domateve e mandarinave në Itali e Greqi. U krijua institucioni i parë i drejtësisë, me njerëz që kanë mbështetjen e plotë të publikut dhe të partnerëve dhe që siç e shikoni dosjet i marrin, i shohin dhe i çojnë në gjykatën speciale duke konfirmuar kërkesën për sekuestro. Në gjithë numrin e tyre mund të ketë njerëz që kanë ngrënë një lugë çorbë të prishur, kanë vjellë njëherë dhe kanë kaluar në dietë vegjetariane. Për këta ka një proces ligjor pas sekuestros ku shkojnë me avokat dhe kanë barrën e provës, ata, jo shteti. Ky është ndryshimi themelor që bëri Italia dhe shumë vend me armiqtë e sigurimit të sigurisë së jetës, kur puna vjen tek kapja fyt më fyt. Të provojnë që “jam i dënuar për trafik droge, por isha korrier dhe bëja korrierin kur mbaroja së mbledhuri domate për atë skllavopronarin greke apo italianë”. Nëse nuk e provojnë ato janë pasuri që i takojnë popullit, shtetit, ato karabinatë e vogla, si e vogla fare që ishte një karabina që po binte dhe i kishte dyert të lyera me ngjyrë flori ato kthehen në asete publike, dhe pastaj sigurisht vazhdon procesi, se ka pjesë tjetër mbrapa”, tha Rama.
