Mjeku infeksionist Pëllumb Pipero ka folur në lidhje me trajtimin me plazmë të pacientëve të infektuar me COVID-19.
Ai është shprehur se nuk mund të pritet ndonjë mrekulli nga trajtimi me plazmë, pasi studimet nuk tregojnë se po u trajtove me plazmën e një të shëruari nga COVID-19 do të shërohesh medoemos.
Pipero është shprehur se nëse krijohet banka e gjakut me plazmë do të përfitojnë të gjithë pacientët e shtruar, por nëse plazmë nuk do të ketë me bollëk, do të përfitojnë personat që nuk janë në gjendje shumë të rëndë.
Ndërkohë ai ka folur edhe për hapjen e shkollave, duke u shprehur se ky ishte vendimi më i mirë i mundshëm që mund të merrej, edhe pse prindërit dhe institucionet arsimore do të duhet të tregojnë kujdes.
“Të gjithë personat me covid të shtruar në spital mund të përfitojnë mnga trajtimi me plazëm.
Do ta rekomandoja në persona që ka disa invitatorë të rëndësishëm, te ata që nuk janë forma ekstreme të rënda, por edhe format e rënda përfitojnë.
Në rast se do krijohet banka e plazmës do të përfitojnë të gjithë personat e shtruar. Nëse nuk e kemi me bollëk, do të përfitojnë personat që janë në gjendje jo shumë të rëndë, por edhe rasteve të rënda mund t’u jepet një shans.
Sa më shpejt të fillohet aq më mirë është, por jo te persona që janë në gjendje të mirë, pasi nuk ka arsye të përdoret. Dua të nënvizoj që nuk duhet të presim ndonjë mrekulli nga plazma, pasi studimet nuk thonë që po u trajtove me plazmë do të shërohesh.
Vendimi i hapjes së shkollave është vendimi më i mirë i mundshëm. Dua të bëj një kujtesë edhe për autoritetet arsimore dhe prindërit që hapja e shkollave nuk do të thotë që s’kemi virus, por të gjithë duhet të kemi kujdes. Do t’i këshilloja prindërit që të jenë të kujdesshëm për fëmijët, t’i këshillojnë të lajnë duart dhe shkolla të krijojë kushtet e duhura.
Mësuesit duhet të jenë shumë të kujdesshëm dhe shkollat duhet doemos të kenë kudjes për mësuesit dhe të monitorojnë situatën e tyre shëndetësore. Hapja e shkollave duhet parë me optimizëm”, tha Pipero.
