Shtrëngim duarsh mes presidentit koreano-jugor, Moon Jae-in dhe motrës së vogël të liderit koreano verior, Kim Jong-un, Kim Yo-jong. Kim Yo-jong, është anëtarja e parë e dinastisë që drejton Korenë e Veriut që viziton Jugun që prej fundit të luftës së Koreve në vitin 1953.
Motra e liderit të Koresë së Veriut Kim Jong-un udhëtoi një ditë më parë në Korenë e Jugut dhe ditën e sotme mori pjesë në ceremoninë e hapjes së Lojërave Olimpike.
Delegacioni, i kryesuar nga Ministri i Sporteve të Koresë së Veriut Kim Il-guk, përfshin 229 nxitëse tifozësh, katër zyrtarë nga Komiteti Olimpik Kombëtar, 26 demonstrues taekëondo dhe 21 gazetarë.
Ndërkohë numri dy i qeverisë amerikane, Mike Pence, i pranishëm në hapjen e ceremonisë e shmangu pjesëmarrjen në darken, ku duhej të ndante tryezën me delegacionin koreano-verior.
Ai pati një përballje të shkurtër me kreun e Asamblesë së Koresë së Veriut, Kim Yong-nam, por që të dy u përpoqën të mos e shihnin njëri-tjetrin në sy. Lojërat zhvillohen në një kohë tensionesh mbi programin bërthamor të Penianit, të cilat pikërisht falë tyre, për momentin të paktën duket të jenë zbutur.
