Kryeministri Edi Rama, nga takimi në Pogradec, ku po përmbyll fushatën elektorale, ka kërkuar që vota më 11 maj të shkojë për PS-në, me premtimin e pasaportës europiane.
“Të vendosim me votën tonë të mos jemi të huaj në zemër të Europës”, tha Rama, teksa shtoi se “të mos vëmë në pikëpyetje vullnetin europian të këtij kombi dhe fatin europian të këtij kombi për mustaqet e Kujtim Gjuzit.”
Fjala e Edi Ramës:
“Ky është momenti për të bërë hapin përfundimtar, që në këto dy vite të çojmë përpara negociatat. Dhe të mos luajmë me fatin tonë siç kemi bërë edhe më përpara ne shqiptarët, jo në një rast. Të mos vënë në pikëpyetje vullnetin europian të këtij kombi dhe fatin europian të këtij kombi për mustaqet e Kujtim Gjuzit dhe të kapërcejmë ato gardhë që na kanë ndarë majtas-djathtas. Kjo nuk është një punë, është mision historik dhe kombëtar.
Dilema me Shqipërinë në BE 2030 apo me bufin e kënetës dhe me kënetën dhe një herë tjetër. Kjo nuk ka për të ndodhur. Nuk jemi këtu për të thënë se kemi merak se nuk marrim shumicën aritmetike për të qeverisur. Tjetër është shumica aritmetike, tjetër është mesazhi i fortë i gjithë popullit për të negociuar si trup i vetëm.U them demokratëve të bëjnë të njëjtën gjë që bënë socialistët në mars 92. Në rast se janë prindër të votojnë për fëmijët e tyre, që tu japin fëmijëve të tyre pasaportën evropiane. Që edhe fëmijët të kuptojnë se për këtë pasaportë, baba dhe nëna votuan bënë një sakrificë të madhe, votuan një maskara si Edi Rama. Le të thonë ç’të duan për mua, por të votojnë 5. Nëse nuk e bëjnë këtë, le të bëjnë atë që bëra unë në mars të ‘92. Nuk shkova fare të votoj. As për askënd tjetër.
