Roland Kryemadhi, babai i 3 vajzave në Kamzë është dënuar me 3 vite burg pasi nuk i lejonte ato të shkojnë në shkollë.
Sakaq edhe e shoqja e tij, është dënuar me 24 muaj burg me kusht.
Kryemadhi akuzohej për dhunë në familje pasi pengonte fëmijët të shkonin në shkollë me pretendimin se ata i shkollonte Allahu.
Disa javë më parë Kryemadhi, u bëri rezistencë efektivëve të policisë, duke i kërcënuar me jetë.
Në dosjen e Prokurorisë thuhet se në momentin që efektivët e policisë kanë shkuar në shtëpinë e tij, ai nuk ka qenë në banesë, por ishte rrugës për në shtëpi me biçikletë.
Pasi e kanë parë, efektivët kanë kërkuar ta shoqërojnë atë drejt Gjykatës së Tiranës, por Kryemadhi ka bërë rezistencë duke goditur në bark një prej punonjësve të policisë.
Ai ka arritur të largohet nga duart e policëve dhe ka hipur në tarracën e banesës së tij me një pistoletë në dorë, duke kërcënuar efektivët.
