Një veture dhe një autobusi me targa të Beogradit i është ndaluar hyrja në pikën e kalimit kufitar në Jarinje të Kosovës. Policia kosovare bën me dije se dy mjetet kanë tentuar të hyjnë në territorin kosovar rreth orës 11:40 minuta të ditës së sotme.
“Personit zyrtar dhe shoqërueseve të tij me veturën Audi me targa “BG”, iu është refuzuar hyrja në Republikën e Kosovës, pasi që të njëjtit nuk kanë poseduar leje për hyrje nga Ministria e Punëve të Jashtme e RKS-së”, sqaron policia
“Po ashtu autobusi i cili kishte ardhur nga Serbia në drejtim të RKS-së, në të cilin kanë qenë klubi i basketbollit “Partizani i Beogradit”, iu është refuzuar hyrja pasi të njëjtit nuk kanë poseduar leje për hyrje nga Ministria e Kulturës, Rinisë dhe Sportit (Federata e basketbollit të RKS-së)”, thuhet gjithashtu.
Pas sqarimeve dhe informacioneve zyrtare që iu janë dhënë, ata janë kthyer në drejtim të Serbisë.
