Gjykata e Tiranës ka vendosur masën e sigurisë “arrest me burg” për Flodian Plakun, 42 vjeç, i njohur edhe me mbiemrat Mamo dhe Serjani, i akuzuar për vrasjen e Gentjan Bejtjas në vitin 2024 në Fushë-Krujë.
Plaku u arrestua dy ditë më parë nga forcat operacionale në Orikum. Para trupit gjykues, ai mohoi përfshirjen në ngjarje, duke deklaruar: “Nuk kam lidhje me ngjarjen, thjesht kam përdorur një Golf para 10 ditësh, ndaj ka ardhur policia tek unë.”
Ai u përfaqësua nga avokati i caktuar kryesisht, Edvis Gorishti, i cili kërkoi një masë më të butë sigurie, por kjo kërkesë u refuzua nga gjykata. Ndërkohë hetimet për zbardhjen e plotë të ngjarjes vijojnë.
