Në Shqipëri, asnjë gjyqtar nuk i është përgjigjur thirrjes së Gjykatës së Lartë, për të kandiduar për postin e anëtarit të Këshillit të Lartë Gjyqësor, i cili duhet të përzgjidhet nga anëtarët e pesë gjykatave të Apelit të rretheve. Pas thirrjes së publikuar për herë të parë më 31 korrik, Gjykata e Lartë sot vendosi të bëjë një thirrje tjetër. Afati për dorëzimin e dokumentacionit është deri më 6 Shtator. Nëse dhe kjo thirrje do të dështojë atëherë sipas ligjit do të përdoret shorti.
Nga të 11 anëtarët që përbëjnë Këshillin e Lartë Gjyqësor, 5 janë përzgjedhur nga jashtë sistemit. Për 6 anëtarët nga radhët e gjyqësorit pati gjithsej 14 kandidatura, nga të cilët vetëm 9 kaluan procesin e rivlerësimit. Sipas ligjit, 6 anëtarët që vijnë nga radhët e gjyqësorit për Këshillin e Lartë gjyqësor përzgjidhen 3 nga gjyqtarët e shkallës së parë, ku së paku njëri duhet të jetë i një gjykate jashtë Tiranës, 2 të tjerë nga Gjykatat e Apelit, ku njëri sërish duhet të jetë nga një gjykatë jashtë Tiranës dhe anëtari i 6 nga Gjykata e Lartë.
Në përfundim të procesit të rivlerësimit, janë 6 gjykatës së shkallës së parë që janë konfirmuar. Nga këta Marçela Shehu, nga gjykata e Kurbinit bën që të plotësohet kriteri për një anëtar nga Gjykatat e rretheve, dhe ajo automatikisht siguron vend në KLGJ e ardhshme, ndërsa 5 të tjerët, do t’i nënshtrohen votimit për dy vendet e tjera.
Për vendin e përfaqësuesit nga Gjykata e Lartë, i vetmi i rikonfirmuar në detyrë, pas procesit të rivlerësimit, është anëtari i saj Medi Bici. Kandidati tjetër, për në KLGJ, Artan Zeneli u rrëzua.
Sa i përket dy vendeve me gjyqtarë të Apelit, janë konfirmuar dy kandidatë, Ilir Toska (Gjykata Apelit Tiranë) dhe Nertina Kosova (Gjykata e Apelit për Krimet e Rënda). Por që të dy vijnë nga Tirana. I vetmi që kishte konkurruar nga rrethet ishte Besim Trezhnjeva i Apelit të Durrësit i cili u rrëzua. Për këtë arsye Gjykata e lartë ka hapur thirrjen për gjyqtarët e Gjykatave të Apelit jashtë Tiranës për të paraqitur kandidaturën për t’u zgjedhur në pozicionin e anëtarit të KLGJ.
E njëjta situatë është dhe për Këshillin e Lartë të Prokurorisë. Për tre vendet nga prokuroritë e Shkallës së parë janë kualifikuar 5 prokurorë, ndërsa tre të tjerë janë ende në pritje. Për kandidatët nga Prokuroria e Përgjithshme, për 1 post në KLP, janë dy prokurorë që kanë kaluar testin, ndërsa pritet përfundimi I procesit dhe për prokurorin Ramadan Troci.
Problematike situata për dy anëtarët që do të duhet të përfaqësojnë Prokuroritë e Apelit. Dy prokurorët, Besa Nikëhasani nga Apeli i Shkodrës dhe Luan Kaloci nga Apeli i Tiranës, u rrëzuan. Në detyrë u konfirmua vetëm, Arben Dollapaj nga Apeli i Shkodrës.Kësisoj mbetet I paplotësuar vendi për një anëtar nga Prokuroritë e Apelit.
Gjendja e krijuar, bën që të dy institucionet, si Këshilli i Lartë Gjyqësor dhe Këshilli i Lartë i Prokurorisë, të mos mund të ngrihen menjëherë. Në rastin më të mirë ato do të mund të krijohen nga fundi i këtij viti./VOA
