Kryetarja e LSI, Monika Kryemadhi ka mbledhur pasditen e sotme një pjesë të strukturave në Tiranë. Fokusi ishte protesta e 16 marsit për të rrëzuar qeverinë.
Në fjalën e saj, ajo iu drejtua mbështetësve të pranishëm se me dorë në zemër i priste të shtunën në protestë. Kryemadhi gjithashtu, bëri deklaratë aspak normale por tanimë të zakonshme në fjalimet e saj.
Ndër të tjera ajo u shpreh se LSI nuk e frikëson as vdekja e jo më një shëmtirë si Rama. E megjithatë, Kryemadhi shfaqi edhe pendesë kur u shpreh se ajo dhe Petriti kanë kusure.
Pjesë nga fjala e saj:
“Politika ka kusuret e saj, qoftë unë, qoftë Petriti, por nuk ka kusure Floida, Keidi, por ne kusuret tona do t’i lajmë dhe do përgjigjemi deri në fund. Kjo është qeveria që grabit qytetarët e saj, kjo është qeveria që grabit votuesit e saj. Sot më shumë se kurrë shqiptarët do të dalin në shesh, jo për të shantazhuar por për të thënë që jemi të lirë. Fatet tona nuk i ka në dorë as Edi Rama, as banditët e Edi Ramës. Ndaj ju lutem me dorë në zemër, sepse është shumë e rëndësishme që në 16 mars të tregojmë se Shqipëria është aty. Nuk na frikëson dot, nuk na frikëson as vdekja, jo më një shmtirë.”
Përgatiti: AlpeNews.al