Një grua në Shtetet e Bashkuara të Amerikës ka rezultuar me koronavirus, edhe pse ka tre javë që nuk del nga shtëpia.
“Jam e tmerruar”, tha Rachel Brummert për televizionin amerikan WCNC. Ajo gjithashu vuan nga sëmundja autoimune. “Nuk kam qenë kurrë kaq sëmurë. Jam shumë e frikësuar nga të gjitha ato që dëgjoj për ventilatorët. Shpresoj ta kaloj në shtëpi”, tha ajo.
Gruaja tha se për tre javë nuk ka dalë fare nga shtëpia. Më herët ajo kishte qenë në farmaci. Ushqimet në shtëpi ia sillte një vullnetare, e cila i linte qeset te dera e shtëpisë.
Rachel Brummert thotë se qeset i merrte me doreza dhe i dezinfektonte sapo i fuste në banesë. Mirëpo vullnetarja rezultoi pozitive me koronavirus disa ditë më parë.
“Kisha zero kontakt me atë. As nuk e preka, e as nuk i flisja”, tregon ajo. “Kam kaluar grip më përapa. Ky nuk është grip, është një monstër”, tha Rachel Brummert e cila vijon të qëndrojë në banesë me bashkëshortin e saj farmacist, por qëndrojnë në dhoma të ndryshme.
