Prokuroria e Gjirokastrës vijon hetimet për të zbuluar shkaqet që e çuan 17-vjeçaren Irsa Muçollari të vetëvritej.
Një nga dyshimet është se ajo i dha fund jetës pasi bullizohej në shkollë. Megjithatë, askush nga gjimnazi ku ajo ndite mësimin nuk pranon që Irsa Muçollari të ketë qenë viktimë e bullizmit. Në Prokurorinë e Gjirokastrës janë zhvilluar seanca pyetësore me nxënës, mësues dhe psikologë, të cilët kanë mohuar që 17-vjeçarja të jetë përballur me ngacmime.
Burime nga prokuroria bëjnë të ditur se sot pritet të merret dëshmia e dy shoqeve të saj, e cila mund të hedhë dritë mbi rrethana të reja dhe detaje shtesë. Deri tani, nuk ka një version zyrtar të mbështetur në prova për arsyet që çuan në vetëvarjen e të resë.
Ndërkohë, një detaj i rëndësishëm vjen nga dita e fundit e jetës së Irsës. Ajo kishte ndezur tre qirinj në Katedralen “Ngjallja e Krishtit” dhe, sipas një besimtareje, ishte shprehur: “Këta janë tre qirinjtë e fundit, nuk do të vij më të lutem.”
Irsa, e cila frekuentonte shpesh këtë katedrale, ishte praktikante dhe pjesëmarrëse në jetën fetare. Ndërkohë, në gjimnaz është dhënë urdhër që nxënësit të mos kontaktojnë me mediat, ndërsa heshtja mbizotëron edhe në Zyrën Arsimore të Gjirokastrës.
