Presidenti i Serbisë, Aleksandër Vuçiç, ka thënë në një prononcim për mediat se kufijtë midis shqiptarëve dhe serbëve janë të nevojshëm.
“Termi “përkufizim” i kufirit do të thotë që kemi kufij mes shqiptarëve dhe serbëve e që sot nuk e dimë ku janë. Pyetja ime është ku janë ata kufij, aty ku themi ne apo aty ku thonë shqiptarët? Askush në botë nuk e di saktë ku janë këta kufij”, është shprehur Vuçiç.
Ai i ka bërë këto deklarata teksa ka folur për detajet e politikës së tij karshi çështjes së Kosovës, në takimin Kina dhe partnerët “16+1” që po mbahet në Beograd.
“Unë kam menduar se është e rëndësishme që të dimë të ardhmen tonë, të kemi paqe dhe stabilitet me shqiptarët në 100 apo 200 vjetët e ardhshme. Qytetarët e Serbisë mendojnë se është më mirë të jemi as në tokë as në qiell. Mirëpo unë mendoj se kjo është gabim, nuk është pikëpamje e gjerë dhe strategjike por mua më takon të respektoj vullnetin e popullit” ka shtuar Vuçiç.
Ndër të tjera, presidenti serb ka konfirmuar për Radion “Evropa e Lirë” se më 11 nëntor do të takojë në Paris presidentin e Kosovës Hashim Thaçi, ku do të vazhdojnë diskutimet për çështjen e Kosovës.
“Në tavolinë është e lejuar të vihet gjithçka prandaj unë po hesht. Kur dëgjoj marrëzi për, nuk e di, Medvegjën, Bujanovcin dhe ku e di se çka, unë nuk bëj zë. Le të thonë gjithçka që mendojnë, dhe do ta shohim a mundemi të mbërrijmë dhe deri një marrëveshje apo jo. Unë qartazi dyshoj, e shoh se nuk ka asgjë prej kësaj pune, shqiptarët në vend se të reduktojnë pritjet e popullit të tyre ata i rrisin ato, krejt e kundërta se si veproj unë këtu në Beograd dhe Serbi” ka thënë Vuçiç.
Ai nuk ka lënë pa përmendur edhe rolin e faktorit ndërkombëtar në këtë situatë të krijuar.
“Kemi një qëndrim hipokrit të bashkësisë ndërkombëtare, në të cilin nuk kanë rënë pre amerikanët. Ky qëndrim thotë se gjoja ndryshimi i kufijve, të cilët nuk e dinë ku janë por mendojnë për kufijtë e Kosovës së pavarur, hap kutinë e Pandorës. Po pse atëherë e keni hapur në vitin 2008, në vitin 2006 apo në vitet e 90’ ta duke e shkatërruar Jugosllavinë? Çfarë keni bërë kështu?” ka shtruar pyetjen në mënyre ironike presidenti serb.
