Dhomat e Specializuara njoftojnë se sot do të mbahet konferenca e radhës për ecurinë e çështjes së ish-krerëve të UÇK-së.
Sipas njoftimit të Dhomave të Specializuara, konferenca për Hashim Thaçin, Jakup Krasniqin, Kadri Veselin dhe Rexhep Selimin do të nisë në orën 14:30.
“Siç është njoftuar në kalendarin tonë, Konferenca e radhës për ecurinë e çështjes në çështjen kundër Thaçit, Veselit, Selimit dhe Krasniqit do të mbahet të premten, më 29 tetor në orën 14:30,” shkruhet në njoftim.
Kujtojmë se Gjykata Speciale në Hagë ka hedhur poshtë kërkesën e parashtruar nga ish-presidenti Hashim Thaçi më 21 gusht kundër vendimit të gjykatësit të procedurës paraprake për mbajtjen e tij në paraburgim.
Kjo është bërë e ditur me anë të vendimit të publikuar në faqen zyrtare të Gjykatës Speciale. Sipas Apelit, Thaçi ka dështuar të dëshmojë se pse vendimi paraprak ka qenë i paarsyeshëm për rreziqet nëse ai lirohet.
Sipas aktakuzës, Thaçi, Veseli, Krasniqi dhe Selimi dyshohen për veprat penale që kanë të bëjnë me krime lufte: ndalim të paligjshëm ose arbitrar, trajtim mizor, torturë dhe vrasje të paligjshme dhe krime kundër njerëzimit: burgosje, akte të tjera çnjerëzore, zhdukje me forcë të personave dhe përndjekje, të cilat, sipas Dhomave të Specializuara, janë kryer midis marsit të vitit 1998 dhe shtatorit 1999. Krimet pretendohet se janë kryer në disa vendndodhje në Kosovë dhe në veri të Shqipërisë, përkatësisht në Kukës dhe Cahan.
