Fiqiri Ismaili u zgjodh për herë të parë kryetar i Bashkisë së Vorës në vitin 2003 dhe e ushtron këtë detyrë për 4 mandate radhazi. Në zgjedhjet e fundit lokale të vitit 2015, Ismaili fitoi me 50.80% të votave si përfaqësues i Partisë Demokratike dhe i Aleancës Popullore për Punë dhe Dinjitet.
Fiqiri Ismaili është diplomuar për Agronomi në Universitetin Bujqësor të Kamzës dhe zotëron master shkencor. Në fillim të viteve ’90 ai themeloi kompaninë e produkteve bujqësore “Agro Blend” dhe punoi prej më shumë se një dekade si administrator i saj.
Zoti Ismaili u zgjodh kryetar i Bashkisë së Vorës në vitin 2003 dhe fitoi 4 mandate radhazi në administrimin e saj. Për shkak të bojkotit të opozitës, ai nuk merr pjesë në zgjedhjet e diskutueshme që pritet të zhvillohen të dielën. [Lexo CV e plotë]
Ky raport është prodhuar nga BIRN pas administrimit të deklaratave të pasurisë nga Inspektoriati i Lartë i Deklarimit dhe Kontrolli të Pasurive dhe Konfliktit të Interesit, ILDKPKI. Ai ka për qëllim bërjen e transparencës mbi pasuritë e kryetarëve aktualë të bashkive të vendit në fund të mandatit të tyre 4-vjeçar.
Skeda grafike e mëposhtme paraqet pasurinë e deklaruar nga kryetari i Bashkisë së Vorës nga viti 2004 deri në fund të vitit 2017. [Kliko për skedën në PDF]
Kryebashkiaku Fiqiri Ismaili deklaronte pasuri familjare me vlerë 36.1 milionë lekë në vitin 2004; kur deklaroi për herë të parë interesat e tij private pranë Inspektoriatit të Lartë të Deklarimit dhe Kontrollit të Pasurive.
Në fund të vitit 2017, pasuria familjare e tij kap vlerën e 94.1 milionë lekëve, duke shënuar një rritje mesatare vjetore prej 4.4 milionë lekësh.
Pasuritë e paluajtshme përbëjnë pjesën kryesore të pasurisë familjare me vlerë të llogaritur në 55.4 milionë lekë. Z.Ismailaj deklaron gjithashtu likujditete bankare prej 26.5 milionë lekësh si dhe automjete me vlerë 12.2 milionë lekë.
Të ardhurat familjare për periudhën deklaruese janë 141.6 milionë lekë. Të ardhurat nga paga si kryebashkiak e Z.Ismaili zënë vetëm 7% të totalit, ndërsa të ardhurat nga paga e bashkëshortes si administratore e kompanisë “Agro Blend” dhe e familjarëve zënë 12%.
Të ardhurat e përfituara nga dividenti i kompanisë “Agro Blend” apo tërheqje dhe sponsorizime sërish nga kjo kompani zënë 28% të totalit. Kryebashkiaku i Vorës deklaron në masën 21% të ardhura nga aktiviteti ndërtimor, ndërsa bashkëshortja e tij të ardhura në masën 7% nga një biznes dytësor i shitjeve online.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. BIRN kreu kontrollin aritmetik/logjik për 13 vite të deklarimit, dy prej të cilave rezultojnë me diferenca negative.
Në vitet 2008 dhe 2011, Z.Ismaili deklaron tërheqje nga depozitat bankare në vlerë më të larta se shumat e deklaruara si të akumuluara nga vitet e mëparshme. Pjesa e pambuluar për këto tërheqje është 635 mijë lekë në vitin 2008 dhe 2.6 milionë lekë në vitin 2011-pa llogaritur në këtë analizë shpenzimet e konsumit familjar.
Ndërkohë, nga analiza cilësore e deklaratave të pasurisë BIRN identifikoi disa “flamuj të kuq”, të cilët lidhen me deklarimet e aseteve të kompanisë dhe kredive të marra në emër të saj apo sponsorizimet e përfituara nga kompania “Agro Blend” për shkollimin e djemve.
Më konkretisht në vitin 2004, kryebashkiaku i Vlorës deklaron pronësinë mbi një serë për prodhim fidanësh me vlerë 210 mijë USD si dhe fabrikë për prodhim plehrash kimikë me vlerë 180 mijë USD. Në të njëjtin vit ai deklaron gjithashtu kredi bankare prej 370 mijë dollarësh dhe 210 mijë dollarësh në emër të biznesit-të cilat nuk janë objekt i deklarimit të pasurisë por i bilancit të biznesit privat.
Megjithatë, Z.Ismaili nuk deklaron pjesën e kapitalit të tij dhe të bashkëshortes në kompaninë “Agro Blend”, që sipas Regjistrit Kombëtar të Bizneseve zotëron kapital me vlerë 570 milionë lekë.
Gjithashtu në vitet në vazhdim deklarohen transaksione të shumta në vlera të konsiderueshme mes llogarive personale dhe atyre të biznesit. Pjesë e këtyre transaksioneve janë sponsorizimet e kompanisë “Agro Blend” për shkollimin e fëmijëve jashtë Shqipërisë.
Një tjetër “flamur i kuq” i identifikuar lidhet me investimin e kryer në fushën e ndërtimit. Në vitin 2005, Z. Ismaili deklaron se ka dhënë një sipërfaqe vreshti me vlerë 900 mijë lekë për ndërtim apartamentesh. Nga ky transaksion ai ka përfituar 30.8 milionë lekë të ardhura brenda të njëjtit vit.
Deklarata e pasurisë së vitit 2004
Deklarata e pasurisë së vitit 2005
Deklarata e pasurisë së vitit 2006
Deklarata e pasurisë së vitit 2007
Deklarata e pasurisë së vitit 2008
Deklarata e pasurisë së vitit 2009
Deklarata e pasurisë së vitit 2010
Deklarata e pasurisë së vitit 2011
Deklarata e pasurisë së vitit 2012
Deklarata e pasurisë së vitit 2013
Deklarata e pasurisë së vitit 2014
Deklarata e pasurisë së vitit 2015
Deklarata e pasurisë së vitit 2016
Deklarata e pasurisë së vitit 2017
Për më shumë dokumente vizitoni databazën tonë dokumente.reporter.al