Ministrja e Shëndetësisë dhe Mbrojtjes Sociale Ogerta Manastirliu ka folur për Neës24 në lidhje me situatën në vend nga pandemia e COVID-19 por edhe për shifrat e fundit.
Manastirliu u ndal dhe tek rasti i gruas shtatzënë në Fier, për të cilën tha se një i afërm nga Tirana ka shkuar në Fier dhe i ka infektuar, duke bërë apel për zbatimin e masave dhe distancimit social.
“Në raportimet tona ditore raportojmë dhe vatrat e krijuara. Vatrat janë familjare dhe nuk kemi transmetime të gjera komunitare. Kemi më shumë risk të lartë në qytetet e mëdha. Tirana mban vendin e parë sa i përket rasteve aktive. Kruja po ashtu, Shkodra mbetet një qytet ku po punohet për gjurmimin e kontakteve. Dje kemi pasur 2 raste në Shkodër. Në Fier kemi pasur një vatër familjare. Dua të apeloj qytetarët sa e rëndësishme është që të ruhet distancimi social. Në Fier, një familjar shkoi nga Tirana në Fier, duke i infektuar. Rregullat nuk duhen thyer, duhet të tregohemi të kujdesshëm”, deklaroi ministrja Manastirliu.
Ajo theksoi se rasti i Fierit, krijoi vatrën e re. “Ndaj nuk duhet të entuziazmohemi dhe të themi; virusi iku. Ky është normalitet i ri ku duhet të ndryshojmë zakonet tona dhe që të jetojmë me rregullat e reja:, tha Manastirliu.