Mexosopranja e njohur shqiptare Flaka Goranci ka marrë vlerësime maksimale nga kritika zviceriane për rolin e Carmenit në “Opera Viva” në Zvicër.
Ministri i Shtetit për Diasporën, Pandeli Majko ka publikuar një shkrim mbi performacën e mexosopranos shqiptare dhe vlerësimin që ajo ka marrë.
“Një Carmen shqiptare në festivalin tradicional në Zvicër, “Opera Viva”. Interpretimi i mexosopranes së njohur Flaka Goranci, u vlerësua maksimalisht nga kritika zvicerane. Bravo Flaka!”, shkruan në Facebook, ministri Majko.
Festivali tradicional i operës “Opera Viva” u mbajt nga data 27 korrik deri më 11 gusht në kantonin më të madh të Zvicrës, Graubunden. Pjesë e saj ishte edhe opera Carmen, një nga më të njohurat e kompozitorit francez George Bizet.
Për rolin kryesor, atë të Carmen, u zgjodh mexosopranoja e njohur shqiptare Flaka Goranci, interpretimi i së cilës u vlerësua maksimalisht nga kritika zvicerane.
Kritika cilësoi në gazetën “Sudostscweiz” se “kush merr përsipër këtë rol, duhet të lërë gjurmë të mëdha dhe të luajë po aq mirë sa edhe këndon. Flaka Goranci ka talent të lindur për aktrim”.
“Natyrisht, pas një kritike të tillë kush nuk do të ndihej mirë. Për mua ka qenë një kënaqësi, një aprovim i gjithë asaj pune, i gjithë përkushtimit tim, por ka qenë edhe një vlerësim mjaft i rëndësishëm sepse të marrësh një kritikë për një rol si Carmen, një rol mjaft kompleks, ka qenë një mrekulli”, u shpreh Goranci.
Carmen është një ndër rolet më të vështira për një mexosoprano, pasi kërkon njëherësh jo vetëm pjekuri vokale, por edhe aftësi interpretative.
“Normalisht që pjekuria vokale arrihet me eksperiencën. Opera “Carmen” është një teatër e pastaj është një opera, ndaj për mua tingëllon mjaft impresionuese mundësia që të këndosh një Carmen, sepse mund të gjesh shume gjëra, të cilat mund t’i kombinosh mjaft bukur”, vijoi më tutje ajo.
