Nga sot, kufijtë me Kosovën, Greqinë, Maqedoninë e Veriut dhe Malin e Zi, janë bllokuar.
Pikat kufitare të Kakavijës, Qafë-Botës dhe Kapshticës, për arsye të parandalimit të COVID-19, nuk do të kalojnë kalimin për në Greqi apo anasjelltas. Do të lejohen të shkojnë në Greqi vetëm shtetasit greke, dhe ata që kanë leje qëndrimi të përhershme në Greqi. Në pikën e kalimit kufitar po ashtu, si edhe në çdo pikë tjetër kufitare, lejohet kalimi i kamionëve që transportojnë mallra.
Po ashtu, pikat kufitare që na lidhin me Maqedoninë e Veriut, Bllata dhe Tushemishti, e aeroporti i Ohrit janë mbyllur deri në një njoftim të dytë. Policia shqiptare njofton se nuk lejohet qarkullimi i automjeteve të vogla, autobusëve dhe udhëtarëve, ndërsa në pikën kufitare të Qafë-Thanës, vijon lëvizja normalisht.
Me rastet e para me koronavirus edhe në Kosovë, u mbyll pika kufitare e Morinës. Lejohet të kalojnë vetëm shtetasit kosovarë, apo shqiptarët që kanë mbetur në Kosovë.
“Policia Kufitare kërkon mirëkuptimin e qytetarëve që të anulojnë lëvizjet e planifikuara dhe ata që ndodhen duke lëvizur në drejtim të këtyre pikave , të kthehen mbrapa, pasi nuk do lejohen të kalojnë”, apelon policia.
Po ashtu janë mbyllur edhe pikat kufitare të Muriqanit dhe Vermoshit që na lidhin me Malin e Zi duke lënë hapur vetëm Hanin e Hotit.
