Aktualisht në Prokurorinë e Tiranës po zhvillohet një takim i thirrur nga drejtuesja e këtij institucioni, Elisabeta Imeraj, ku merr pjesë Drejtori i Policisë së Tiranës, Lorenc Panganika, së bashku me vartësit e tij, shefat e 6 komisariateve dhe ato të krimeve të rënda.
Gazetari i Report Tv, Arsen Rusta, mëson se po diskutohet mbi dosjet e vjetra ose të pazbardhura, ato që konsiderohen pa autor por edhe ato të mbetura në sirtar.
Nga ana tjetër po diskutohet mbi aktivitetin kriminal që zhvillohet në kryeqytet, por edhe sa i përket Call Center-ave. Report Tv raportoi pak ditë më parë mbi Call Center-at që mashtronin qytetarët, hetim që vijon të jetë i hapur.
Vetëm prokuroria e Tiranës ka 7 procedime penale, nga ana tjetër edhe Prokuroria e Posaçme Kundër Krimit dhe Korrupsionit, e cila nëpërmjet letërporosisë së mbërritur nga autoritetet gjermane ka edhe ajo një hetim të veçuar, dhe janë hetimet që do kalojnë në filtra dhe do vënë para drejtësisë personat e përfshirë.
7 procedime nga Prokuroria e Tiranës, ku rezulton se pas Call Center-ave që kryejnë një aktivitet të paligjshëm në vend, përmes platformës FOREX, mashtrojnë qytetarë kryesisht të huaj.
Ata kanë një aktivitet të ligjshëm Call Center-i dhe telemarketingu i produkteve shtëpiake, por brenda kësaj aplikojnë platformën FOREX duke mashtruar qytetarët e huaj që të investojnë.