Detaje shokuese zbardhen çdo ditë që kalon nga vrasja e e 23 vjeçares Eglantina Buci nga babai dhe vëllai i saj, Faik e Shkëlzen Buci, në 2012.
Mësohet se para se ta ekzekutojë të bijën me një plumb në ballë, Faiku ka provuar disa herë që ta vrasë por ka dështuar. Hera e fundit kishte qenë një javë para vrasjes në Malin me gropa. Faiku e ka gjurmuar të bijën dhe e ka pritur me pistoletë në dorë te “Shkolla e Bashkuar”, por ajo e ka kuptuar dhe është fshehur, duke i shpëtuar vrasjes.
Pas disa tentativave të dështuara për ta vrarë, ai ka planifikuar kurthin duke paguar një djalë që të joshë Eglantinën, e për ta çuar atë më pas në Malin me gropa, aty ku dhe është ekzekutuar me një plumb në ballë e më pas është groposur.
Ndërkaq zbulohet se pasi e ka vrarë dhe e ka groposur në mal, babai dhe djali kanë shkuar 5 ditë më vonë në vendin e ngjarjes, për të marrë trupin e pajetë të saj dhe për ta çuar në një vend tjetër.
Në nëntor të 2019-ës, eshtrat 23 vjeçares u gjetën nga një gjahtar, i cili njoftoi policinë dhe kështu u hodhën hapat e para të hetimit, që u desh 8 vite të zbulohet ngjarja e plotë.
