Vetëvrasja e 25-vjeçares Xhuana Nikollaj ka rikthyer në vëmendje pasojat ekstreme të dhunës në familje. E reja, e cila kishte lënë pas një martesë të dështuar, ishte zhvendosur nga Shëngjini në Tiranë me synimin për të nisur një jetë të re, larg dhunës.
Në pamundësi ekonomike për të jetuar e vetme, ajo ndante banesën me mikeshat, ndërsa kishte përfunduar studimet e larta dhe priste të gjente një punë për të siguruar një jetë të qëndrueshme.
Sipas të dhënave hetimore, 25-vjeçarja është dhunuar në banesën me qira nga ish-bashkëshorti i saj, Eraldo Fizi, i cili e ka goditur në trup dhe në kokë. Ngjarja dyshohet të ketë ndikuar drejtpërdrejt në gjendjen e rënduar psikologjike të të resë.
Në kushte dëshpërimi, Xhuana Nikollaj konsumoi fostoksinë, duke tentuar t’i japë fund jetës. Ajo u gjet në gjendje kritike nga një prej shoqeve dhe u transportua me urgjencë në Qendrën Spitalore Universitare “Nënë Tereza”, ku, pavarësisht përpjekjeve të mjekëve, humbi jetën.
Në një letër të lënë pas, e reja i kërkonte falje prindërve dhe shprehej se nuk donte të lëndohej më. Ndërkohë, ekspertiza mjeko-ligjore ka konfirmuar shenja dhune në trupin e saj.
Ish-bashkëshorti është shpallur në kërkim nga autoritetet, nën akuzat për “dhunë në familje” dhe “shkaktim të vetëvrasjes”.
Rasti i Xhuana Nikollaj nuk është i izoluar. Të dhënat tregojnë se dhuna në familje mbetet një problem shqetësues në vend, ndërsa në disa raste ajo ka çuar në pasoja fatale, përfshirë edhe vetëvrasjen e viktimave. Alepews.al ju rikujton disa nga rastet më të dhimbshme të vetëvrasjes.
Bedrie Loka
Bedrie Loka ishte nëna e tre fëmijëve, një vajze dhe dy djemve. Më i vogli ishte dëshmitar i dhunës që babai, Xhemal Loka, ushtronte ndaj nënës së tij dhe madje e kishte filmuar me celular, një dëshmi tronditëse që mjaftoi për ta dënuar Xhemal Lokën. Bedrie Loka i dha fund jetës në banesën e tyre në fshatin Vadardhë, Durrës, më 2 janar 2024.
Fillimisht u tha se akti ekstrem ishte pasojë e bullizmit në rrjetet sociale, por hetimet zbuluan se bashkëshorti i saj, një ish-emigrant i skeduar për çështje droge, e dhunonte sistematikisht. Fëmijët rrëfyen para policisë se babai i dhunonte nënën në mënyrë të përsëritur.
“Babi e kishte dhunuar mamin me grushta, e kishte shtrirë përtokë, ishin zënë me njëri-tjetrin dhe mami ishte nxirë komplet nga krahët dhe në pjesë të trupit,” rrëfeu djali i mitur i çiftit. Vajza e madhe tregoi bisedën e fundit me nënën: “Atë natë nuk isha e qetë, ajo më tha: ‘Do e qep mami, do e qep’ dhe fiku telefonin. Kur shkova te spitali më tha me shpresë se do të shpëtonte, ‘boll durova më’.” Xhemal Loka është dënuar me 10 vite burg.
Sibela Abedini
E bullizuar në rrjetet sociale, e mbetur pa punë dhe me një fëmijë të vogël për tu kujdesur, Sibela Abedini zgjodhi t’i japë fund jetës duke u hedhur nga lartësia e një pallati në Kamzë. Për akuzën “shkaktim vetëvrasjeje” po gjykohet Altin Coku, i cili nuk e dhunoi fizikisht, por psikologjikisht, pasi presioni i shkaktuar nga publikimi i fotove intime e shtyu 27-vjeçaren të merrte këtë vendim.
Alma Arrazi
Historia e saj është ndoshta nga më tronditëset. Nga dhuna psikologjike, Alma zgjodhi të hidhej në lumin Buna bashkë me tre fëmijët e saj. Katër viktima brenda një familjeje. Tragjedia ndodhi më 3 maj 2024 dhe shokoi Shkodrën dhe opinionin publik. Erdgys Arrazi, bashkëshorti i Almës dhe babai i tre fëmijëve, është dënuar me 4 vite burg për shkaktim vetëvrasjeje.
Rastet janë të shumta, dramat njerëzore janë tronditëse. Humbjet janë të jashtëzakonshme. Vajza e gra që nuk shohin dritë në fund të tunelit për shkak të dhunës fizike dhe psikologjike dorëzohen duke i dhënë fund jetës. Historitë e këtyre vajzave dhe grave thërrasin për ndërgjegjesim: nëse shoqëria nuk reagon sot, nesër mund të jetë vonë.
