Dhjetë ditëshi i fundit i muajit janar ka rezervuar ditë shumë të ftohta. Sinoptikania e Meteoalb, Lajda Porja tha se duke nisur nga sot pasdite do të ketë rënie të menjëhershme të temperaturave.
Nga nesër e në vijim do ketë mot të kthjellët, por shumë të ftohtë, të paktën deri të enjten e ardhshme. E hëna pritet të jetë dita më e ftohtë.
“Mëngjesi ka vijuar ende i ngrohtë, për shkak të qarkullimit të masave me origjinë nga jugu. Pritet që orët vijuese, në pjesën e dytë të ditës do ketë masa të ftohta nga rrethi polar.
Do ketë menjëherë rënie të temperaturve duke i konvertuar reshjet e shiut në reshje dëbore.
Mëngjesin e së shtunës do ketë spostim të vranësirave, duke bërë që moti të jetë i kthjellët , megjithatë do jetë shumë ftohtë. Temp në fundjavë -10 apo -11 gradë në vendet malore.
Maksimalet gjatë fundjavës nuk do ngjiten më shumë se 7 apo 8 gradë.
Ky i ftohtë do qëndrojë disa ditë, të paktën deri të enjten. Do kemi ditë shumë të ftohta dhe më pas të ftohta. Nga e mërkura vlera negative në -15 gradë në zonat malore.
Edhe në Tiranë temperaturat do të zbresin në -5 gradë.
Dita më e ftohtë përcaktohet dita e hënë dhe e marta e ngjashme. Ka një tërheqje të valës ditën e enjte. Problematike do jenë ngricat në akset rrugore.
Do jetë parametri i erës prezent që nga fundjava deri në mesin e javës. Më pas do kemi në ditët e fundit të janarit ditë të ftohta, por jo aq shumë të ftohta sa do përjetojmë gjatë këtyre ditëve”, deklaroi sinoptikania Lajda Porja për News24 .
