Është ndarë nga jeta në mënyrë të parakohshme në moshën 63-vjeçare, mjeshtri i valles shqiptare, një nga emrat më të njohur të këtij zhanri të artit Rexhep Çeliku. Ai ishte solist i parë i Ansamblit të këngëve dhe valleve.
Rexhep Çeliku, lindur me 19 korrik 1954 në Tiranë, i cili që nga viti 1976 është solist i Ansamblit të Këngëve dhe Valleve Popullore.
Artisti i Madh numëron në reportorin e tij artistik rreth 8 mijë shfaqje, ku ka interpretuar 32 mijë role brenda dhe jashtë vendit.
Si e ka nisur karrierën e tij “Mjeshtëri i Madh”
Nga një punëtor ndërtimi në një valltar fluturues. Kështu e nisi karrierën Rexhep Çeliku, duke thyer beton pranë Teatrit të Operës dhe Baletit.
Ai nuk mund ta merrte me mend se institucioni pranë të cilit punonte do të shndërrohej më pas në shtëpinë e tij të dytë.
Vetëm katër ditë më parë ai pati edhe shfaqjen e fundit në publik, ku Presidenti i Republikës, Ilir Meta i akordoi zotit Rexhep Çeliku Dekoratën “Nderi i Kombit” me motivacionin: “Në vlerësim të kontributit të jashtëzakonshëm si solist me nivel të lartë dhe mjeshtëri të veçantë artistike në interpretimin e valleve shqiptare; për promovimin denjësisht të vlerave të mirëfillta të trashëgimisë sonë kulturore kombëtare brenda dhe jashtë vendit, si dhe për pasurimin e fondit të krijimtarisë koreografike dhe përçimin e tij tek brezat e artistëve të rinj”. Përgatiti:AlpeNews.al
