Influencuesi kontrovers Andrew Tate dhe vëllai i tij, Tristan Tate, janë arrestuar në Shtetet e Bashkuara të Amerikës, pasi autoritetet britanike ngritën akuza të reja penale ndaj tyre dhe kërkuan ekstradimin e tyre në Mbretërinë e Bashkuar.
Shërbimi i Prokurorisë së Kurorës (CPS) njoftoi se ndaj Andreu Tate janë ngritur shtatë akuza të reja për përdhunim, si dhe akuza të tjera që lidhen me trafikim njerëzor dhe vepra të tjera penale.
Ndërkohë, Tristan Tate akuzohet për një rast të sulmit seksual, dy raste përdhunimi dhe tre raste të organizimit ose lehtësimit të trafikimit për shfrytëzim seksual. Sipas autoriteteve britanike, veprat e dyshuara janë kryer gjatë periudhës nga korriku i vitit 2010 deri në gusht të vitit 2017. Me këto akuza të reja, numri i viktimave të pretenduara në këtë çështje ka arritur në shtatë.
Shërbimi i Marshalëve të SHBA-ve konfirmoi arrestimin e vëllezërve Tate, ndërsa Departamenti Amerikan i Drejtësisë bëri të ditur se ndalimi i tyre është kryer në kuadër të procedurave të ekstradimit të kërkuara nga autoritetet britanike.
Avokati i tyre, Joseph McBride, deklaroi se Andreu dhe Tristan Tate janë të pafajshëm dhe i cilësoi akuzat si të motivuara politikisht. Ai tha se çështja është ngritur për t’iu kundërvënë një padie për shpifje që vëllezërit kanë paraqitur në SHBA, duke shprehur bindjen se ata do të lirohen pasi, sipas tij, faktet do të shqyrtohen nga gjykata.
Në maj të vitit 2025, prokurorët britanikë kishin konfirmuar se Andreu Tate përballet me gjithsej 21 akuza penale, ndërsa Tristan Tate me disa akuza të rënda, për ngjarje që pretendohet se kanë ndodhur mes viteve 2012 dhe 2016. Në vitin 2024, policia e Bedfordshire kishte siguruar urdhër-arreste evropiane për kthimin e tyre nga Rumania, ku ata ndodheshin nën hetim për çështje të tjera penale.
Vëllezërit Tate kanë mohuar vazhdimisht çdo akuzë ndaj tyre. Tashmë pritet vendimi i autoriteteve amerikane lidhur me kërkesën për ekstradimin e tyre drejt Mbretërisë së Bashkuar, ku do të përballen me procesin gjyqësor për akuzat e ngritura.
