Kryeministri i vendit Edi Rama do të flasë sot për herë të parë për patentat e ish-ministrit të brendshëm, Saimir Tahiri.
I pari i qeverisë ka zgjedhur emisionin “Studio e Hapur” në News 24 dhe do të jetë live që prej orës 21:00, i gatshëm për tu përgjigjur për ngjarjen më të fundit që i shtohet dosjes së ish-ministrit të tij të Brendshëm, si dhe do të flasë me detaje për raportin me Tahirin para dhe pas akuzave të ngritura nga prokuroria.
Pjesë thelbësore e intervistës është edhe marrëdhënia e politikës me krimin dhe kanabisi. Akuzat e opozitës së bashkuar kundër tij personalisht si koka e krimit në Shqipëri, por edhe qeverisjes në tërësi do të marrin gjithashtu vëmendjen e duhur.
Rama do të rrëfehet përballë Eni Vasilit edhe për marrëdhënien delikate dhe komplekse që ka me mediat si dhe përplasjet e fundit që ka krijuar me to.
Kreu i qeverisë nuk do i shmanget as temave delikate si marrëdhënia e tij me George Soros dhe raportet me administratën e re amerikane dhe presidentin Trump, që njihet si kundërshtar i hapur i Sorosit.
Politika dhe pushteti të afron me miq të rinj, por shpeshherë edhe miqtë e vjetër i largon prej teje. Rama do të flasë për herë të parë edhe për këta të fundit, miqtë e humbur dhe për të ardhmen.
