Nga breshëri në borë, izolohen 300 familje në Dukagjin

Rreth 300 familje izolohen totalisht në Dukagjin nga Mali Shoshit deri në Qafë Thorë nga bora. Të dy rrugët që lidhin Shkodrën me Dukagjanin janë bllokuar. Në aksin Qafë Thorë-Theth ka rreth 60 cm borë dhe nuk mund të kalohet as me mjete me zinxhir dhe as në këmbë. Po ashtu në aksin Breg Lumi-Mali Shoshit ka rreth 40 cm borë dhe rruga është bllokuar. Banorët prej 5 ditësh janë pa energji elektrike për shkak se është bllokuar kanali që furnizon me ujë hidrocentralin e fshatit Ndërlyse nga i cili marrin energji elektrike fshatrat e tjerë. Kërkohen mjete për zhbllokimin e rrugëve dhe kanalit të HC por deri me tani asnjë mjet nuk është dërguar në asnjerën prej rrugëve të Dukagjinit dhe banorët nuk dihet se për sa kohë do të qëndrojnë totalisht të izoluar.
Ata bëjnë thirrje për ndihmë sepse ndodhen në kushte të vështira duke qenë se nuk ka as mjek. Situata është alarmante dhe kërkohet ndërhyrja urgjente e institucioneve.