Ish-presidenti amerikan, njëherësh kandidat për të qenë në krye të Shtëpisë së Bardhë, Donald Tramp (Trump) ka zhvilluar një intervistë me miliarderin Elon Mask (Musk) në platformën që zotëron ky i fundit, X.
Intervista pati një fillim jo të favorshëm, me probleme teknike që fillimisht penguan shumë përdorues ta shihnin atë.
Mask fajësoi vonesën për një sulm kibernetik “masiv”, por shkaku i defektit nuk ishte plotësisht i qartë.
Pasi intervista filloi me më shumë se 40 minuta vonesë, Tramp u ndal fillimisht në atentatin ndaj tij, duke e cilësuar “të dështuar”.
Edhe pse Tramp më parë tha se do ta ndante historinë vetëm një herë në konventën republikane muajin e kaluar, ai përsëri ka diskutuar në detaje gjatë intervistës me Mask.
“Ishte një mrekulli. Nëse nuk do ta ktheja kokën, nuk do të flisja me ty për momentin, aq sa më pëlqen”, i tha Tramp-Mask.
Ish-presidenti më pas u fokusua në diskutimin e pikëpamjeve të tij të zakonshme kundër imigracionit, duke paralajmëruar “njerëzit ” që përpiqen të hyjnë në vend përmes kufirit SHBA-Meksikë.
“Këta janë njerëz që janë në burg për vrasje dhe të gjitha llojet e gjërave dhe po i lirojnë në vendin tonë”, tha Tramp.
Ky i fundit vijoi më tej të sulmonte kundërshtaren e tij, Kamala Harris, si “carin e kufirit” të administratës Bajden, edhe pse zyrtarët demokratë dhe ekspertët e të drejtave të emigrantëve e kanë kundërshtuar atë karakterizim të portofolit të saj të politikës. Ai e tallte vazhdimisht Harrisin si një demokrate “radikale” që kishte “shkatërruar” Kaliforninë kur ajo shërbeu si prokurore e përgjithshme e shtetit dhe më vonë senatorja e saj.
Ekipi i Harris reagoi menjëherë ndaj deklaratave të bëra nga Tramp në X, duke dënuar intervistën si një shembull të “ekstremizmit dhe axhendës së rrezikshme të Projektit 2025” të Tramp.
“E gjithë fushata e Trump është në shërbim të njerëzve si Elon Mask dhe ai vetë – të pasur të fiksuar pas vetes, të cilët do të shesin klasën e mesme dhe që nuk mund të transmetojnë live në vitin 2024”, tha Joseph Costello, një zëdhënës i fushatës Harris.
Intervista erdhi pasi Harris ka dalë përpara në sondazhe pas nisjes së fushatës së saj muajin e kaluar. Decision Desk HQ dhe mesatarja kombëtare e sondazheve të Hill-it tani tregojnë Harris me një avantazh prej 0.3% ndaj Tramp, i cili kishte një avantazh 3.3% ndaj Bajden përpara se presidenti të tërhiqej nga gara.
