Partia Demokratike i është rikthyer sulmit ndaj mediave amerikane fill pasi këto të fundit kanë investiguar lidhjet e kryedemokratit Lulzim Basha me Rusinë dhe pagesat e kryera prej tyre për të promovuar Bashën në Uashington.
Përmes një deklarate nga “selia blu”, folësja e kësaj force politike ka sulmuar drejtpërdrejt “Mother Jones” ku e ka akuzuar se është media ekstremiste e majtë dhe se e ka paguar Edi Rama.
Pas deklaratës së bërë, nuk u paraqit asnjë provë nga organet e demokratëve për të vërtetuar akuzat e artikuluara.
Mbase PD i është rikthyer kohës kur ish-kryeministri Sali Berisha e cilësonte gazetën më prestigjoze në botë “New York Times”, si të denjë për letër higjenike pasi kjo e fundit investigoi aferat që sollën tragjedinë e “Gërdecit”.
Deklarata e PD-së
Shkrimi i publikuar në Mother Jones, një media ekstremiste e majtë e njohur për qëndrimet e saj anti-Trump, është financuar nga Edi Rama me para të paligjshme.
Shkrimi është pjesë e një fushate të qëllimshme për të mbuluar kokainën dhe lidhjet e familjes Rama me të.
Akuzat me rusë të artikullit janë thellësisht qesharake, por për t’i bërë edhe më qesharake, sot ato i ripërcolli Elisa Spiropali.
Elisa, e cila nga puna në doganë duket se ka krijuar një njohje të veçantë për oligarkët, ka bërë sot një sallatë ruse me oligarkë dhe Kremlin.
Është shenjë e nivelit të turpshëm të korruptimit dhe inkriminimit të Partisë Socialiste fakti që ruajtësja e nderit në PS është bërë Elisa Spiropali. Por është akoma më e rëndë që një parti e tërë po angazhohet përherë e më shumë në mbrojtje të drogës dhe të krimit.
Edhe ky cikël akuzash të mercenarëve të paguar me paratë e kontrabandës dhe trafikut që kur Elisa ishte Drejtoreshë e Përgjithshme e Doganave, do të diskretitohen.
Ajo që mbetet është ajo që ka rëndësi – Saimir Tahiri si trafikant dhe familja Rama e përfshirë në tregtinë e kokainës.
Këta janë rreziku i destabilizimit të Shqipërisë.
